Մենուայի ջրատարը նոր գրավիչ վայր կդառնա Թուրքիա այցելող զբոսաշրջիկների համար

Ուրարտուի թագավոր Մենուայի կառուցած ջրատարը նոր գրավիչ վայր կդառնա Թուրքիա այցելող զբոսաշրջիկների համար: Այդ մասին գրում է «Հյուրիեթ Դեյլի Նյուզ»-ը:
3000 տարի առաջ կառուցված ջրատարը 51 կմ երկարություն ունի: Կառուցված լինելով Վանի արևելյան արվարձանի՝ Գյուրփընար (Gürpınar) թաղամասում՝ այն ջուր է մատակարարում քաղաքի կենտրոն:
Թուրք հնագիտ Ռաֆետ Չավուշօղլուն «Հյուրիեթ Դեյլի Նյուզ»-ի հետ հարցազրույցում նշել է, որ մոտակայքում գտնվող որոշ խոշոր ժայռեր փորագրություններ ունեն: Հնագետը նաև խոսել է ջրատարի անվանման ծագումնաբանության մասին՝ նշելով, որ հայերը այն անվանել են Մենուայի ջրատար, սակայն հետագայում այն վերանվանվել է Շամրան:
«Հայ պատմաբան Մովսեսը (Մովսես Խորենացին-Ակունքի խմբ.) վկայում է, որ Շամրան անվան ծագումնաբանությունը գալիս է Ասորեստանի թագուհի Շամիրամի անունից: Ուրարտունիներից հետո Շամիրամ թագուհին վերակառուցում է այն իր 42 հազար աշխատողների օգնությամբ»,- նշում է Ռաֆետ Չավուշօղլուն՝ հավելելով, որ Մենուայի կինը՝ Թարարյան, այգի է ունեցել, որը նույնպես ոռոգվել է այդ ջրատարի միջոցով: Այժմ թագուհու այգու տեղում է գտնվում Էդրեմիտի Yeşil Vadi (Կանաչ հովիտ) բնակավայրը:
Ըստ հնագետի՝ այժմ ծրագիր է մշակվում, համաձյան որի` ջրատարի կողքով ճանապարհ է կառուցվելու՝ հեծանվային արշավների համար:
Լիլիթ Քոչինյան
http://www.azatutyun.am/archive/news/20140729/2031/2031.html?id=25474203