Ես ոչ թե քրդական ծագում ունեմ, այլ հենց քուրդ եմ

Թուրքիայի նախագահի թեկնածու, Ժողովուրդների դեմոկրատական կուսակցության համանախագահ Սելահաթթին Դեմիրթաշը Քադըքոյի զբոսայգիներից մեկում հանդիպում է անցկացրել քաղաքացիական ակտիվիստների հետ: Նախագահի ընդդիմադիր թեկնածուի գալուստը հանրահավաքի մասնակիցները դիմավորել են երգ ու պարով:
Դեմիրթաշը ելույթ է ունեցել և անդրադարձել իր էթնիկ պատկանելության մասին տարատեսակ խոսակցություններին:
«Ես ոչ թե քրդական ծագում ունեմ, այլ հենց քուրդ եմ: Ես դուրս եմ եկել քուրդ ժողովրդի, քրդական քաղաքական պայքարի, քրդերի ազատության համար մղվող պայքարի բովից: Մինչև հիմա էլ շարունակում եմ այդ պայքարը: Ցանկանում ենք այդ պայքարը միասնականացնել Թուրքիայում ճնշյալ ու հալածյալ մյուս էթնիկ ինքնությունների կրողների հետ»,- ասել է Դեմիրթաշը:
Ըստ թուրքական «Հաքիմիյեթ» կայքի տեղեկացման` Դեմիրթաշը խոսել է բոլոր ճնշված աշխատավորների միավորման անհրաժեշտությունից` անկախ այն բանից, թե հալածյալը հայ է, քուրդ, թուրքմեն կամ ազերի:
http://ermenihaber.am/?lang_id=2&news_=3&cur_news=1900