Տունս սիրով հայերին կտամ, սակայն մեր պետությունը սխալ է. թուրք բնակիչը՝ Հաթայի հայերի պատմական տներից իրենց հանելու մասին

Թուրքիայի Հաթայ նահանգի Հըդըրբեյ գյուղում այս օրերին իրարանցում է, տեղեկացնում է «Ակօս» շաբաթաթերթի կայքը: Գյուղի պատմական տները վերակառուցվելու են, իսկ ներկայում այդ տներում բնակվող գյուղացիներին տեղափոխելու են այլ վայրեր:
Գյուղացիները չեն պատկերացնում, թե ինչպես է տեղի ունենալու իրենց տարհանումը:
Այդ պատմական տներից մեկում է բնակվում 58-ամյա Հանեֆի Յըլդըրըմը: «Գյուղապետն ինձ ասաց, որ այս տան դիմաց ինձ 25 հազար թուրքական լիրա են տալու, սակայն այդ գումարով 100 քառակուսի մետրանոց տարածք գնել հնարավոր չէ: Ես 90-ամյա մորս հետ որտե՞ղ եմ բնակվելու, եթե դուրս գամ այս տնից»,-ասում է նա:
Գյուղի հայկական անցյալը
1939թ.-ին, երբ Հաթայը միացվել է Թուրքիայի Հանրապետությանը, շրջանի հայ, արաբ, հույն բնակչությունը գաղթել է Սիրիա կամ Լիբանան: Հանեֆի Յըլդըրըմի տունը գյուղի հայերին պատկանած տներից մեկն է միայն:
Մինչև 1940թ.-ը տունը պատկանել է Նարեկ Աբրահամյան անունով մեկին: Այդ հին տներում բնակվողների մեծ մասը սեփականության վկայական այդպես էլ չի ստացել:
Իմ պապերն այստեղ «բերվել են»
«Մենք այստեղ հաստատվել ենք ընդամենը 80 տարի առաջ: 1938-1939թթ.-ին, երբ շրջանի հայերը գաղթել են ու լքել Թուրքիան, Յողունօլուք, Վաքըֆլը, Հըդըրբեյ և այլ գյուղեր ամբողջությամբ դատարկվել են, և ոչ ոք չի մնացել: Այդ ժամանակների նախագահ Իսմեթ Ինոնյուն, Աթաթուրքի մահվանից մեկ տարի անց, տարբեր վայրերից մարդկանց հավաքել է այստեղ: Իմ ընտանիքն էլ է այդպես հաստատվել»,- պատմել է հայկական տան ներկայիս բնակիչը:
Նա պատմել է, որ իրենց գյուղն ավերակի է վերածված եղել: Երբ իրենց ընտանիքը հաստատվել է այդ գյուղում, 6 ազգի բնակիչ է ունեցել, սակայն հետագայում միայն իրենք և սուննի թուրքմեններն են մնացել:
Յըլդըրըմը պատմել է, որ իր տան նախկին տիրոջ՝ Նարեկ Աբրահամյանի թոռները Լիբանանից իրենց այցի են եկել, այդ ընթացքում ծանոթացել և հյուրընկալել է նրանց:
«Ես հայկական հիմնադրամի սիրով կհանձնեմ այս տունը, անհանգստության կարիք չկա: Սակայն գոնե մենք չտուժենք: Ես, ի՞նչ է, վրա՞ն եմ դնելու: Պետությունը ճանապարհը լայնացնելու նպատակով պահանջեց, որ քանդեմ իմ գոմն ու պահեստը: Արեցի: Այժմ էլ տունս է ուզում: Դու պետություն ես, դու ուժեղ ես: Պետության դեմ ես անզոր եմ, սակայն իմ վնասը փոխհատուցել է պետք»,-ասել է նա։
http://www.tert.am/am/news/2014/07/24/hatay-yildirim/