Հայ զբոսաշրջիկները Կարսի բերդի վրա հայկական եռագույնն են պարզել ու երգել ՀՀ հիմնը՝ զայրացնելով թուրքերին

Չնայած հայ-թուրքական սահմանի փակ լինելուն՝ Անիի ավերակներում միջոցառումներ կազմակերպած և Կարսի բերդի վրա հայկական եռագույնը պարզած հայ զբոսաշրջիկները թուրքերի կողմից բացասական վերաբերմունքի են արժանացել, գրում է «Կարս թերթ» թուրքական պարբերականը։
Տեղի ունեցածին արձագանքել է «Հայկական անհիմն պնդումների դեմ պայքարի միությունը», որի ղեկավար Գյոքսել Գյուլբեյը հայտարարել է, թե հայերն «ազատ տեղաշարժվելով» գալիս բերդի վրա դրոշ են պարզում, և համապատասխան մարմինների ուշադրությունն է հրավիրել այդ փաստի վրա։
Նա հայտարարել է, թե տեղի ունեցածը հայկական լոբբիի և Սփյուռքի նախարարության «գաղտնի նախագծի մի մասն է»՝ 2015թ.-ին Ցեղասպանության 100-ամյակին ընդառաջ։
Հակահայկական գործունեություն ծավալող կառույցի համոզմամբ՝ «այսպես կոչված Արևմտյան Հայաստանի (իր իսկ ձևակերպումն է) տարածքում ընտրված քաղաքներում հայերը փորձելու են սադրիչ քայլերի գնալ՝ սադրելով այդ քաղաքների թուրք բնակիչներին»։
«Տեղի է ունենում այն, ինչից մենք վախենում էինք։ Հայերի գաղտնի նախագիծը կիրառվել է Կարսում՝ մի խումբ հայերի կողմից։ Հայաստանից ժամանած մի խումբ Կարսի բերդը տեսնելու պատրվակով բարձրացել է պարիսպներին և պարզել Հայաստանի դրոշն ու երգել ազգային հիմնը։ Նույնը կրկնվել է նաև Վանի Աղթամար կղզում։ Ո՞վ է հայերին այդ վստահությունն ու հանգստությունը տալիս»,- հարցրել է գործիչն ու դժգոհել կառույցների անվտանգության համար պատասխանատու անձանց աշխատանքից։
http://www.tert.am/am/news/2014/07/23/kars-armenians/