Թուրքիայի նախագահի թեկնածու. «Հարսնացուիս հայ են դարձրել, մորս` ռուս»

Թուրքիայի նախագահի ընդդիմության միասնական թեկնածու Էքմելեդդին Իհսանօղլուն հյուրընկալվել է «CnnTurk»-ով եթեր հեռարձակվող «Չեզոք գոտի» հեղինակավոր ծրագրում:

Իհսանօղլուն վստահություն է հայտնել, որ օգոստոսի 10-ին կայանալիք նախագահական ընտրություններում հաղթանակ կտանի: Նա կարևորել է նաև երկու ավանդական կուսակցությունների միջև միասնության ձևավորումը այն դեպքում, երբ Թուրքիայի քաղաքական կյանքը միաբևեռ դարձնելու ջանքեր են թափվում:
Անդրադառնալով իր էթնիկ ծագման շուրջ երբեմն ծավալվող խոսակցություններին` նախագահի թեկնածու Իհսանօղլուն նշել է, որ լուրջ չի վերաբերվում նման ասեկոսեներին:
«Իմ հարսնացուին հայ են դարձրել, իմ մորը` ռուս: Է, թող լինի: Ոչ մեկին պատասխան չեմ տվել, քանի որ ստախոսի մոմը կարճ է վառվում»,- ըստ թուրքական «Միլլիյեթ» պարբերականի` ասել է Իհսանօղլուն:
Պաղեստինցիների դեմ Իսրայելի ձեռնարկած ռազմական գործողությունների վերաբերյալ Իհսանօղլուն հակիրճ ասել է, որ դա ոչ առաջին անգամն է, ոչ էլ վերջինն է լինելու:
http://ermenihaber.am/?lang_id=2&news_=7&cur_news=1700