Դեմիրթաշ. «Թուրքիան երկերեսանի քաղաքականություն է վարում»

Ժողովուրդների դեմոկրատական կուսակցության (ԺԴԿ-HDP) կողմից Թուրքիայի նախագահի թեկնածու առաջադրված Սելահաթթին Դեմիրթաշը նախընտրական քարոզարշավ է անցկացնում Եվրոպայում: Ֆրանսիայի մայրաքաղաք Փարիզի հրապարակում հանրահավաք անցկացրած Դեմիրթաշն անդրադարձել է մի շարք խնդիրների:
Դեմիրթաշը դատապարտել է Պաղեստինի դեմ ուղղված Իսրայելի ռազմական գործողությունները և նշել, որ Թուրքիան այդ հարցում երկերեսանություն է դրսևորում: Մի կողմից հայտարարում է, թե ցավում է Գազայի համար, մյուս կողմից Իսրայելի հետ զենք-զինամթերքի գործարքներ է անում:
«Թուրքիայի կառավարությունն Իսրայելի վրա բղավելու փոխարեն թող չեղյալ հայտարարի այդ պետության հետ եղած ռազմաառևտրային պայմանագրերն ու զորավարժությունների մասին համաձայնագրերը»,- ըստ «Թայմ թուրք» լրատվական կայքի` նկատել է Դեմիրթաշը:
Վերջինս իր ելույթի ընթացքում անդրադարձել է նաև նախագահի մեկ այլ թեկնածու` Ռեջեփ Թայիփ Էրդողանի այն հայտարարությանը, թե «ԺԴԿ»-ն չպետք է տեղ ունենա Թուրքիայի խորհրդարանում: Դեմիթաշը նշել է, որ Էրդողանի համար «ԺԴԿ»-ականները փաստորեն համերկրացիներ չեն, բացի դրանից Էրդողանի համար անընդունելի զանգված են հայերը, ալևիները, ասորիները, եզդիները: Եվ առհասարակ Էրդողանի համար թշնամի են բոլոր նրանք, ովքեր իր գլխավորած կուսակցությանը չեն ձայն տալիս:
http://ermenihaber.am/?lang_id=2&news_=3&cur_news=1888