Թուրքիայում սպանված հայ զինծառայողի գործով վկային պարբերաբար սպառնացել են

Թուրքիայում զինծառայության ընթացքում՝ 2011թ. ապրիլի 24-ին, սպանված Սևակ Շահին Բալըքչըի սպանության գործով կեղծ ցուցմունք տված Հալիլ Էքշիի դատավարությունը շարունակվում է. տեղեկացնում է «Ակօս» շաբաթաթերթի կայքը:
Դատավարության ընթացքում մեղադրյալները պատմել են, թե ինչ ճնշումների են ենթարկվել՝ Սևակին սպանած Ալի Աղաօղլուի դեմ ցուցմունք չտալու համար:
Աղաօղլուն ասել էր, թե դեպքը միտումնավոր տեղի չի ունեցել, և ազատազրկվել էր 4 տարի 5 ամիս ժամկետով: Սակայն այժմ այդ գործով վկայություն տված Հալիլ Էքշին նշում է, որ ինքը Աղաօղլուի ընտանիքի ճնշման տակ է եղել և ստիպված է եղել փոխել ցուցմունքը:

Նա իր առաջին ցուցմունքում նշել էր, որ Սևակ Բալըքչըն կանխամտածված սպանության զոհ է դարձել, սակայն հետագայում փոխել էր ցուցմունքը: Երկրորդ անգամ նա նշել էր, թե Սևակն ու Քըվանչը չեն վիճել, և դեպքը տեղի է ունեցել կատակելու ընթացքում:
Էքշիի մայրը դատարանում տված ցուցմունքում նշել է, որ Աղաօղլուի մորեղբայրը զանգահարել է տուն և ցանկացել խոսել որդու հետ: «Երբ որդիս վերադարձավ ծառայությունից, պատմեց, որ սպանություն է տեղի ունեցել: Քըվանչի անունը տվեց: Դեռ մեկ ամիս էլ չէր անցել, տան հեռախոսին զանգեցին: Քըվանչի մորեղբայրն էր, որդուս հետ խոսել էր ցանկանում: Ես էլ ամուսնուս հեռախոսահամար տվեցի, ասացի, որ նրա հետ խոսեն»,-պատմել է վկայի մայրը:

Էքշիի հայրը դատարանում պատմել է, որ ծառայությունից վերադառնալուց հետո որդուն պարբերաբար զանգահարում և սպառնում էին:

http://www.tert.am/am/news/2014/07/18/sevag-ekshi/