Հայ-թուրքական սահմանի բացման խնդրի տակ թաքնված է Ադրբեջանում թուրքական դպրոցների փակման հարցը

Լուրերն այն մասին, թե Թուրքիայի գործող վարչապետ, նախագահ առաջադրված թեկնածու Ռեջեփ Թայիփ Էրդողանը ծրագրել է առաջիկայում ընթացք տալ հայ-թուրքական կարգավորման գործընթացին, իրականում այլ շարժառիթ է ունեցել: Դրանց հետևում թաքնված է Ադրբեջանում թուրքական դպրոցների փակման հարցը:
Այս մասին տեղեկացնում է «Ռոթա հաբեր» լրատվական կայքը: Ըստ վերջինիս` Թուրքիայի իշխանությունները սահմանի բացման հարցը փորձել են օգտագործել որպես ճնշման գործիք կամ շանտաժ` Ադրբեջանում թուրքական դպրոցների փակումը կասեցնելու համար: Անկարան փորձել է Բաքվին հասկացնել, որ եթե փակվեն թուրքական դպրոցները, ապա հնարավոր է բացվի հայ-թուրքական սահմանը, իսկ Թուրքիայում գտնվող ադրբեջանական ներդրումներն էլ հայտնվեն ճնշումների տակ:
Հիշեցվում է, որ Թուրքիայի ընդդիմադիր գործիչները սահմանի հնարավոր բացման մասին խոսակցություններին կոշտ արձագանք տվեցին: Մասնավորապես Ազգայնական շարժում կուսակցության (ԱՇԿ-MHP) պատգամավոր Օքթայ Վուրալը հայտարարել էր, որ առանց Ղարաբաղի հարցի լուծման սահմանի բացումը կնշանակի Թուրքիայի տարածաշրջանային քաղաքականության տապալում: Իսկ մեկ այլ ընդդիմադիր ուժի` ժողովրդահանրապետականների կարծիքով` Անկարան հայ-թուրքական կարգավորման հարցի միջոցով փորձում է հաճոյանալ Միացյալ Նահանգներին:
Նշենք, որ թուրքական իշխանությունները պաշտոնապես հերքել էին «Թարաֆ» թերթի տարածած տեղեկությունն այն մասին, որ վարչապետ Էրդողանը հրահանգել է ավարտին հասցնել հայ-թուրքական սահմանի Ալիջանի անցակետի բացման նախապատրաստական աշխատանքները:
http://ermenihaber.am/?lang_id=2&news_=7&cur_news=1693