Թուրքիայում եկեղեցիների առջև ոստիկաններ են կարգվել` դրանք հավանական հարձակումներից փրկելու նպատակով

Ստամբուլի Յեշիլքյոյ շրջանում գտնվող լատինական կաթոլիկ եկեղեցու վրա տեղի ունեցած հարձակումից հետո կառավարությունը որոշում է կայացրել` ոստիկաններ կարգել եկեղեցիների առաջ` դրանք նմանատիպ վտանգներից ազատելու նկատառմամբ:
Akunq.net-ի փոխանցմամբ` այդ մասին Ստամբուլում հրապարակվող «Ակօս» հայկական շաբաթաթերթում գրում է Ույգար Գյուլթեքինը:
Աղբյուրի հաղորդմամբ` հուլիսի 10-ին Թուրքիայի փոխվարչապետ Բյուլենթ Արընչը զանգահարել է Ստամբուլի Բեյօղլու շրջանում գտնվող Սուրբ Մարիամ Աստվածածին ասորական եկեղեցու վաքըֆի նախագահ Սաիթ Սուսինին, քանի որ նաև ասորիների կողմից օգտագործվող Յեշիլքյոյի լատինական կաթոլիկ եկեղեցում հարձակման պահին մի ասորի ընտանիք մկրտության արարողություն էր անելիս եղել:
Արընչը հետաքրքրվելով, թե արդյոք սույն հարձակումը անհանգստության տեղիք չի տվել ասորական համայնքում և իր վրդովմունքը հայտնելով դեպքի կապակցությամբ, նաև հաղորդել է, որ ինքը անհրաժեշտ հնահանգներ է տվել նման հարձակումները կանխելու նպատակով:
Արընչի զանգից հետո Բաքըրքյոյ շրջանի անվտանգության տնօրինությունը ոստիկաններ է կարգել այստեղի բոլոր եկեղեցիների մոտ: Այսուհետև կիրակի օրերը եկեղեցիների դռան մոտ կկանգնեն ոստիկաններ` համազգեստներով ու քաղաքացիական հագուստներով:
Հիշեցնենք, որ Յեշիլքյոյի լատինական կաթոլիկ եկեղեցին հարձակման էր ենթարկվել սույն թվականի հունիսի 15-ին, երբ կնունքի արարողության ժամանակ այստեղ էր ներխուժել դանակներով զինված 8 հոգանոց մի խումբ: Մկրտության արարողության ընթացքում այդ խումբը հանդես էր եկել «Քրիստոնյաների արմատը կտրելու ենք» կարգախոսով: Թեև հարձակված անձինք նկարահանվել էին եկեղեցու անվտանգության տեսախցիկով, սակայն ոստիկանությունը մինչ այժմ չի գտել ու ձերբակալել նրանց: Նույն եկեղեցին նման հարձակման էր ենթարկվել նաև մայիս ամսին:
Akunq.net