Հայաստանը կդիմի ՄԻԵԴ՝ Փերինչեքի գործում որպես երրորդ կողմ ներգրավվելու համար

Մինչև օգոստոսի 26-ը Հայաստանը պաշտոնական հայտով կդիմի Մարդու իրավունքների եվրոպական դատարան (ՄԻԵԴ)` թուրք ազգայնական գործիչ Դողու Փերինչեքի գործում որպես երրորդ կողմ ներգրավվելու համար: Հուլիսի 15-ին լրագրողների հետ զրույցում այսպիսի հայտարարություն է արել գլխավոր դատախազ Գևորգ Կոստանյանը՝ պատասխանելով Փերինչեքի գործում Հայաստանի՝ որպես երրորդ կողմ ներգրավվելու մասին հարցին:
2007թ. մարտի 9-ին թուրք ազգայնական գործիչ Դողու Փերինչեքը Շվեյցարիայի Վո կանտոնի դատարանի կողմից ենթարկվել էր ինչպես ֆինանսական, այնպես էլ քրեական պատասխանատվության Հայոց ցեղասպանությունը ժխտելու համար: Վո կանտոնի դատարանը և Դաշնային գերագույն դատարանը մերժել էին մարտի 9-ի դատավճռի դեմ ներկայացված բողոքը: 2013թ. դեկտեմբերի 17-ի իր որոշման մեջ ՄԻԵԴ-ի իրավասու պալատը որոշում էր կայացրել, ըստ որի՝ շվեյցարական դատարանի վճռով խախտվել է բողոքարկողի ինքնաարտահայտման ազատությունը:
Մարդու իրավունքների եվրոպական դատարանի՝ Թուրքիայի Աշխատավորական կուսակցության ղեկավար Դողու Փերինչեքի գործով կայացրած որոշման կապակցությամբ իրենց մտահոգությունն էին հայտնել աշխարհի տարբեր երկրներում ապրող ավելի քան երեսուն ցեղասպանագետներ և պատմաբաններ, որոնք փետրվարի 14-ին բաց նամակ էին ուղղել Շվեյցարիայի արդարադատության և ոստիկանության դեպարտամենտի ղեկավար Սիմոնետա Սոմարուգային: Վերջինիս բաց նամակով դիմել էր նաև Թուրքիայի Մարդու իրավունքների ասոցիացիան:
2014թ. հունիսի 2-ին Եվրոպական դատարանի հինգ դատավորներից բաղկացած կազմը կայացրել է գործի քննությունը Եվրոպական դատարանի Մեծ պալատ ընդունելու մասին որոշում: Սա նշանակում է, որ դատարանի 17/12/2013թ. վճիռն ուժի մեջ չի մտնի:
Իրավաբան Վահե Գրիգորյանը վստահ է՝ ՄԻԵԴ-ի Մեծ պալատի կողմից այս գործի քննությունը այլևս չի անցնի այն համատարած լռության մթնոլորտում, երբ դիմող կողմ Թուրքիան, «լիարժեք կերպով օգտվելով այս գործի հարցում Հայաստանի Հանրապետության կառավարության անհասկանալի լռությունից և անգործությունից, կարողացել էր հասնել այնպիսի արդյունքի, որը գործնականում Հայոց ցեղասպանության մերժողականության հարցում ամենաերևելի ձեռքբերումն էր նրա կողմից»: Բացի այդ, ըստ Գրիգորյանի, «Դողու Փերինչեքն ընդդեմ Շվեյցարիայի» գործն առաջինն է առհասարակ, երբ որևէ միջազգային դատական ատյան քննության առարկա է դարձրել Հայոց ցեղասպանությանն ուղղակիորեն առնչվող հարց:

http://civilnet.am/kostanyan-armenia-perincek-case-echr-involve-third-party/