Թուրքիայի ԿԸՀ-ն պաշտոնապես գրանցել է նախագահի պաշտոնի երեք թեկնածուների

Թուրքիայում ավարտվել է երկրի ղեկավարի պաշտոնին թեկնածուների գրանցման գործընթացը, որի համար կպայքարեն երեք քաղաքական գործիչներ: Համապատասխան որոշումը այդ երկրի կենտրոնական ընտրական հանձնաժողովը հրապարակել է Resmi Gazete պաշտոնական կառավարական մունետիկում և այն մտել է ուժի մեջ, հաղորդում է ИТАР-ТАСС-ը:

Երկրի առաջնորդի աթոռի համար կմրցեն Թուրքիայի գործող վարչապետ Թայիփ Էրդողանը, ընդդիմությունից միասնական թեկնածու «Իսլամական կոնֆերանս կազմակերպության» նախկին ղեկավար Էքմելեդին Իհսանօղլուն և քրդամետ Ժողովուրդների ժողովրդավարության կուսակցության համանախագահ Սելյահաթին Դեմիրթաշը:

Վերլուծաբանների մեծ մասի կարծիքով՝ այս պահին հաղթանակի ամենամեծ շանսերն ունի Էրդողանը: Նա արդեն 11 տարի է քաղաքականության մեջ վարչապետի պաշտոնում. երկիրը կառավարելու նման փորձ իր մրցակիցները չունեն: Էրդողանը հանդես է գալիս երկրի հետագա զարգացման, դրա միջազգային կարգավիճակի բարձրացման օգտին: Նա խոստացել է շարունակել քրդական կարգավորման գործընթացը և «զուգահեռ կառույցների» հետ պայքարը, որը խարխլում է թուրքական պետականությունը:

Իհսանօղլուն Թուրքիայում հարգված քաղաքական գործիչ է: Նա հանդես է գալիս թուրքական արժեքների՝ աշխարհիկ իսլամի, ընտանիքի ավանդույթների, աշխատանքի, կրթության զարգացման օգտին: Նա նաև առաջնահերթ է համարում օրենքի անվերապահ գերակայությունը:

Դեմիրթաշը բավականին երիտասարդ քաղաքական գործիչ է և հանդես է գալիս էթնիկ, մշակութային և լեզվական իրավահավասարության օգտին: Այդ կարգախոսները համապատասխանում են երկրի քուրդ բնակչության և Թուրքիայում ապրող այլ ազգերի շահերին: Սակայն, մի շարք տեղական վերլուծաբանների կարծիքով, Դեմիրթաշը հաղթանակի մեծ շանսեր չունի:

Ընտրությունների առաջին փուլը, որոնք կանցկացվեն ուղիղ քվեարկության միջոցով, կկայանա օգոստոսի 10-ին, երկրորդը նախանշված է օգոստոսի 24-ին:
http://www.tert.am/am/news/2014/07/11/candidates-turkey/