Թուրք հաքերները կոտրել են «Ակօս»-ի կայքը և սպառնացել վերացնել հայերին

Ստամբուլում հրատարակվող «Ակօս» երկլեզու (հայերեն, թուրքերեն) պարբերականի էլեկտրոնային կայքը ենթարկվել է հաքերային հարձակման: Կայքը կոտրելուց հետո հաքերները տեղադրել են Թուրքիայի վարչապետ և նախագահի թեկնածու Ռեջեփ Թայիփ Էրդողանի մեծադիր լուսանկարը, գրել ռասիստական արտահայտություններ` այլոց և գովեստի խոսքեր` Էրդողանի հասցեին:
«Մենք շատ ենք տեսել ձեզ պես դավաճանների: Գիտենք ձեր արածներն ու անելիքները: Բայց սրանից հետո մենք ենք լինելու: Օսմանյան մեծ պետությունը առաջնորդ Էրդողանի հետ միասին վերածնվում է: Այս ձայնը օսմանցու ըմբոստ ձայնն է.

Ընդդեմ Հայաստանի, ընդդեմ ԱՄՆ-ի, ընդդեմ Իսրայելի: Արմատներդ չորացնելու ենք»,- նշված է հաքերեների կողմից կայքում զետեղված հաղորդագրության մեջ:
Հաքերներն իրենց թիրախում առել են նաև «Ակօս»-ի հիմնադիր խմբագրապետ լուսահոգի Հրանտ Դինքին:
«Ոմանք դեռ Հրանտ Դի՞նք են ասում: Մի մոռացեք` աշխարհում եթե անգամ մի թուրք էլ մնա, ձեզ հետապնդելու է»:
Թուրքական մի շարք լրատվամիջոցներ «Ակօս»-ի վրա կատարված այս հարձակումը որակում է որպես իշխող Արդարություն և զարգացում կուսակցության կողմից իրականացված գրոհ:
http://ermenihaber.am/?lang_id=2&news_=4&cur_news=1763