Թուրքիայի նախագահի թեկնածու Էքմելեդդին Իհսանօղլուն պաշտոնապես սկսել է իր նախընտրական քարոզարշավը: Լրագրողների հետ հանդիպման ժամանակ նրան հարց է ուղղել «Թարաֆ» թերթի հայազգի սյունակագիր Հայկո Բաղդադը:
«Դուք միջազգային հարթակներում պաշտոններ զբաղեցրած անձ եք և Թուրքիայի նախագահ լինելու պարագայում մոտ ժամանակներում Թուրքիայի ամենակարևոր հարցերից մեկը 1915 թվականի դեպքերի (Հայոց ցեղասպանության-Ակունքի խմբ.) 100–ամյակն է լինելու, և այս հարցը օրակարգային կլինի և միջազգային հարթակներում, և Թուրքիայի ներքաղաքական կյանքում: Դուք միջազգային իրավունքի տեսանկյունից ինչպես եք գնահատում 1915 թվականի դեպքերը: Ի՞նչ կասեք հրապարակված ցավակցական ուղերձի մասին: Արդյոք այն թերի՞ է, չափից ավելի՞ է, թե՞ բավարար»,-հարցրել է Բաղդադը Իհսանօղլուն:
«1915 թվականին եղած ցավալի դեպքերը մեզ միշտ վշտացրել են և շարունակելու են վշտացնել: Ես շատ լավ եմ հիշում, երբ 1970–ականներին, որպես համալսարանի դասախոսական կազմի երիտասարդ անդամ, մասնակցում էի մշակույթի նախարարության միջոցառումներին և սերտ կապեր ունեի արտգործնախարարության հետ: Այս երկու նախարարությունների միջոցառումներին մասնակից լինելով` տեղյակ եմ նաև հարցի էությանը: Կառավարության ցավակցական ուղերձը ճիշտ և տեղին էր: Թուրքիան այս հարցը պետք է լուծի համբերատարությամբ, սառնասրտությամբ` օգտագործելով դիվանագիտության և գիտության բոլոր ճանապարհները: Այս պահին ավելին չեմ ուզում ասել»,-պատասխանել է Իհսանօղլուն:
Ankakh.com
Leave a Reply