Դիարբեքիրի Սուրբ Կիրակոս եկեղեցում պատարագ է մատուցվել

Դիարբեքիրի Սուրբ Կիրակոս հայկական եկեղեցում այս տարվա ընթացքում երկրորդ անգամ մատուցված պատարագին մասնակցել է Պոլսո հայոց պատրիարքի փոխանորդ Արամ արքեպիսկոպոս Աթեշյանը։

Ինչպես տեղեկացնում է «Ակօս» շաբաթաթերթի կայքը, աշխարհի տարբեր կողմերից բազմաթիվ հայեր են ժամանել՝ մասնակցելու պատարագին։
Հայաստանից եկած պարախումբն էլ եկեղեցու բակում ազգային երգ ու պար է ներկայացրել։
2012թ-ին վերաբացված Սուրբ Կիրակոս եկեղեցում տեղի ունեցած պատարագին մասնակցել են Ամերիկայից, Ավստրալիայից, Ֆրանսիայից, Անգլիայից, Թուրքիայի տարբեր քաղաքներից ժամանած հայեր, ինչպես նաև հոգևորականներ՝ Արամ արքեպիսկոպոս Աթեշյանի գլխավորությամբ։ Մասնակցել են նաև Սուրի նախկին քաղաքապետ Աբդուլլահ Դեմիրբաշը, Դիարբեքիրի տարբեր հասարակական կազմակերպությունների ներկայացուցիչներ, հայեր։

Վաղ առավոտյան եկեղեցում հավաքվածները նախ մոմեր են վառել և աղոթել, ապա հավաքվել են եկեղեցու բակում, զրուցել, լուսանկարվել։
Պատարագից առաջ լրագրողների հետ զրույցում Արամ արքեպիսկոպոս Աթեշյանը նշել է, որ Դիարբեքիրից գաղթած հայերի զավակներն ամեն տարի այցելում են եկեղեցի և մասնակցում արդեն ավանդական դարձած պատարագին։ «Մերձավոր Արևելքի ամենամեծ եկեղեցին համարվող Սուրբ Կիրակոսի հոգևոր մթնոլորտը զգալը մեր համայնքին երջանկացնում է»,- ասել է նա։

Նա նշել է, որ եկեղեցու վերանորոգման աշխատանքների 95%-ն ավարտվել է, և վերանորոգման ծախսերը հոգացել են համայնքն ու Դիարբեքիրի քաղաքապետարանը։ «Սա համաշխարհային ժառանգություն է, և Մշակույթի ու զբոսաշրջության նախարարության աջակցությունը ևս անհրաժեշտ է»,- ասել է Աթեշյանը։

Արքեպիսկոպոսն անդրադարձել է նաև քրդական հարցին։ «Յուրաքանչյուր պատարագի ընթացքում աղոթում ենք խաղաղության համար։ Քուրդ-թուրքական խնդրի կարգավորման ընթացքը միայն այդ ազգերի հարցը չէ. դա բոլորիս է առնչվում։ Մեկի հանգստությունը բոլորիս հանգստությունն է, մեկի ցավը՝ բոլորիս ցավը»,- ասել է նա։
http://www.tert.am/am/news/2014/07/10/diarbekir-giragos/