Թուրքիայում պոլսահայ մտավորականին 6 ամսում արդեն 4 գաղութ են տեղափոխել

Թուրքիայի բնակվող պոլսահայ լեզվաբան, գրող, հրապարակախոս Սևան Նշանյանը, որը ազատազրկված է Ալիաղա Շաքրանի փակ ռեժիմով գաղութում, տեղափոխվել է մեկ այլ փակ ռեժիմով կալանավայր` Այդըն Յենիփազար:
Այս տարվա հունվարի 2-ից ազատազրկված Սևան Նշանյանին դատարանը մեղավոր էր ճանաչել Իզմիրի Շիրինջե գյուղում 40 քմ հողատարածքի վրա ապօրինի կառուցապատում անելու մեջ: Մինչդեռ իրականում Նշանյանի նկատմամբ Էրդողանի վարչակազմը քաղաքական հետապնդում է իրականացնում և նրան լռեցնելու զանազան պատրվակներ ստեղծում: Նշանյանը ենթարկվում է հալածանքների, քանի որ անխնա քննադատության է ենթարկում Թուրքիայի հանցավոր անցյալը և ներկայիս իշխանությունների վարած քաղաքականությունը: Բոլորովին վերջերս Նշանյանը հրապարակել էր «Սխալ հանրապետություն» գիրքը, որտեղ ներկայացված է ողջ հանրապետական Թուրքիան` իր արատավոր կողմերով: Նույնիսկ բանտային տարրական պայմանները Նշանյանի համար չեն ապահովում. Նախկին կալանավայրում`Բուջայում, նրան մինչև անգամ մահճակալ չէին հատկացրել և արգելել օգտվել բաղնիքից: Ազատազրկության 6 ամսում արդեն Նշանյանին տեղափոխել են 4 գաղութ:
Թուրքական «Դեմոկրատ հաբեր» լրատվականին մեկնաբանություն տված Սաիթ Չեթինօղլուն, ով «Ազատություն Սևան Նշանյանին» միջազգային հանձնաժողովի անդամ է, ասել է, որ կառավարության կողմից Նշանյանի նկատմամբ բանեցվող ճնշումն ու սահմանափակումները պետք է վերացվեն: Չեթինօղլուն նաև նշել է, որ թուրքական իշխանությունները Նշանյանին 4 տարվա ազատազրկման դատապարտելով` ռեալ նպատակ են ունեցել 2015-ին` Հայոց ցեղասպանության 100-րդ տարելիցին, պահել անազատության մեջ:
http://ermenihaber.am/? lang_id=2&news_=9&cur_news=482