Էրդողանի՝ Հայաստանի վերաբերյալ ծրագրերը՝ 2015թ.-ին ընդառաջ. թուրքական պարբերականի անդրադարձը

Թուրքիայի պատմագիտական ընկերության (TTK) ղեկավար Մեթին Հյուլագուի պաշտոնավարման ժամկետը չերկարաձգվելուց հետո բացահայտվեց, որ Էրդողանը Թուրքիայի նախագահական ընտրություններից հետո Հայաստանի հետ հարաբերությունների հարցով նոր քայլեր է պատրաստվում ձեռնարկել։
Ինչպես տեղեկացնում է թուրքական «Այդընլըք» պարբերականը, պրոֆեսոր Մեթին Հյուլագյուի պաշտոնավարման ժամկետը թուրքական կառավարության կողմից չերկարաձգելու պատճառը, ըստ տարածված տեղեկությունների, հենց «հայերին ցավակցելու» շարունակությունն էր։
«Ակօս»-ի գլխավոր խմբագիր Ռոբեր Քոփթաշը ևս պնդում է, TTK-ի ղեկավարի պաշտոնանկությունն ու Էրդողանի՝ 1915թ.-ի ժառանգներին ցավակցելու ուղերձը փոխկապակցված են, իսկ Habertürk-ի հոդվածագիր Մուրաթ Բարդաքչըն նշում է, որ դա ոչ թե հրաժարական էր, այլ նրա պաշտոնավարման ժամկետը չերկարաձգում։
«Այդընլըք»-ը, սակայն, պնդում է, որ Թայիփ Էրդողանը նախագահ ընտրվելուց հետո Հայկական հարցի վերաբերյալ նոր քայլեր է ձեռնարկելու։
Թուրք պրոֆեսորի հրաժարականի մասին հայտնի դարձավ նախորդ շաբաթ, սակայն Habertürk-ի տվյալներով դա ոչ թե հրաժարական էր, այլ պարզապես նրա պաշտոնավարման ժամկետը չի երկարաձգվել։
Ռոբեր Քոփթաշը, սակայն կարծում է, որ իրականությունն այլ է։ Նրա համոզմամբ՝ կառավարությունը 2015թ.-ին ընդառաջ պատրաստություն է տեսնում։
«Իրականում խնդիրն այն է, որ Արդարություն և զարգացում կուսակցությունը Հայկական հարցի հանդեպ նոր մոտեցմամբ է հանդես գալիս։ Իշխանությունը, վարչապետ Էրդողանի ցավակցական ուղերձով, նոր դիրքորոշում է ներկայացնում, իսկ Թուրքիայի պատմագիտական ընկերակցության «հին մտածելակերպով» աշխատակիցների հետ աշխատել չի ցանկանում։
«Այդընլըքին» հասած տեղեկությունները համընկնում է Քոփշաթի տեսակետին։ Դիվանագիտական աղբյուրները հաղորդում են, որ մինչև նախագահական ընտրությունները Էրդողանը Հայաստանի հետ հարաբերություններում որևէ քայլ չի ձեռնարկելու, իսկ արտգործնախարարությունը պնդում է, որ սահմանի բացումը օրակարգում չէ։
Սակայն նախագահ դառնալուց և կառավարության ձևավորումից հետո Հայկական հարցի առնչությամբ նոր քայլեր են ձեռնարկելու։ Արտգործնախարարությանը մոտ կանգնած աղբյուրի տվյալներով՝ «Օգոստոսի 10-ից հետո բոլորովին նոր Թուրքիա է լինելու»։ Թուրքիայի պատմության ինստիտուտում կատարված փոփոխություններն էլ պետք է դիտարկել այդ տեսանկյունից։
http://www.tert.am/am/news/2014/07/08/erdogan-armenia/