Ստամբուլում հայ կնոջ սպանության մեջ մեղադրվող անձը հուսով է, որ իրական հանցագործներին շուտով կգտնեն

Ստամբուլում 85-ամյա հայուհի Մարիցա Քյուչուքին 12 տեղից դանակահարելով ու ծեծելով սպանելու մեջ կասկածվող ազգությամբ հայ Մուրադ Նազարյանը դատական նիստի ընթացքում իրեն մեղավոր չի ճանաչել. տեղեկացնում է «Ջիհան» գործակալությունը։
«Ես ցանկանում եմ, որ մեկ վայրկյան առաջ ձերբակալվեն մեղավորները։ Ես ել եմ տուժած»,- ասել է նա։
Դատավարությանը ներկա են եղել նաև տուժող կողմի զավակները։
Դատավոր Էրոն Ջեյլանը հիշեցրել է, որ դատապաշտպանի պնդմամբ՝ Նազարյանի հոգեկան վիճակը ստուգվել է, և այդ կապակցությամբ զեկույց է նախապատրաստվել։ Նազարյանը սպանությունից առաջ հոգեկան խնդիրներ է ունեցել և բուժում ստացել։
Այնուհանդերձ դատարանը վճռել է մինչև օգոստոսի 19-ը երկարաձգել Մուրադ Նազարյանի կալանքի ժամկետը։ Մինչ այդ, Մարիցա Քյուչուքի տանը՝ ճերմակ սփռոցի վրա հայտնաբերված նմուշների ԴՆԹ փորձաքննություն է իրականացվելու և դա համեմատվելու էր Մուրադ Նազարյանի տվյալների հետ։
Նախորդ դատական նիստի ընթացքում, սպանության օրվա մասին պատմելիս Մուրադ Նազարյանը նշել է, որ մարդիկ, ում նախկինում չի տեսել և չի ճանաչել, իրեն նստեցրել են մեքենան և դեղ տվել։ «Այդ մարդկանց առաջ չէի տեսել, բայց նրանք ինձ անունով դիմեցին, և ես կարծեցի, թե ոստիկաններ են և նստեցի մեքենան։ Ինձ դեղ տվեցին, ինչից հետո ուշաթափվեցի։ Միայն հիշում եմ, որ մատիցս արյուն վերցրին»,- պատմել էր նա։

Ստամբուլի գլխավոր դատախազության ներկայացրած մեղադրական եզրակացության մեջ նշվում է, որ կասկածյալ Նազարյանը «դաժանաբար և չարչարելով կանխամտածված սպանություն է իրականացրել», և նրան ցմահ ազատազրկելու պահանջ է ներկայացվել։

Հիշեցնենք, որ Ստամբուլի Սամաթիա թաղամասում հայ տարեց կանանց դեմ հարձակումների մի քանի դեպքեր էին գրանցվել։ Մարիցա Քյուչուքը տուժածներից մեկն էր։
http://www.tert.am/am/news/2014/07/03/murat-nazarian/