«Տարբեր» երեխաները՝ խտրականության թիրախ Թուրքիայում

Թուրքիայում գործող Gundem երեխաների միությունը «Թուրքիայում երեխաների հանդեպ խտրականության» մասին իր զեկույցում բացահայտել է այն փաստը, որ երկրում բացի չափահասներից՝ խտրականության են ենթարկվում նաև զարգացման փուլում գտնվող անչափահասները: Թուրքիայում առաջին անգամ պատրաստված նման զեկույցը միտված է այս ոլորտում պետական քաղաքականության և պատասխանատվության խթանմանը: Զեկույցը ֆինանսավորվել է Թուրքիայում ֆիննական դեսպանության կողմից:
Փաստաթղթում, որը խրախուսում է ՀԿ-ների և քաղաքացիների օգնությամբ տարվող պայքարը խտրականության դեմ, մատնանշվում է խտրականության 15 տարբեր տեսակ, որոնցից են՝ ազգայնական, էթնիկական, գենդերային հողի վրա կամ պայմանավորված սեռական կողմնորոշման, հաշմանդամություն ունենալու, ծնողների զբաղեցրած պաշտոնի, ազատազրկված ազգական կամ ամուսնալուծված ծնողներ ունենալու հանգամանքներով և այլն:
Զեկույցում բերվում են հայ, հույն, հրեա և քուրդ լինելու պատճառով խտրականության ենթարկված երեխաների բազմաթիվ օրինակներ: Այսպես՝ քրիստոնյա երեխաներից մեկը պատմել է. «Ծոծրակիս խաչի դաջվածք կա: Մի օր, երբ երթուղային էի սպասում, մի տղամարդ մոտեցավ և ականջիս ասաց. «Կա՛մ սիրիր, կա՛մ լքիր» [«Ազգայնական կուսակցության» կարգախոս, որն օգտագործվում է հիմնականում հայերի և քրդերի համար, երբ հնչում է քննադատություն երկրի հասցեին – ՍիվիլՆեթ]»:
14 տարեկան մի հայ աղջիկ էլ պատմել է, որ իր թուրք ընկերը, որի հետ սիրային կապի մեջ էր, հաճախ ասում էր. «Դու հայ ես, ուրեմն տրվելու ես ինձ, հայերը տրվող են»:
Զեկույցում մանրամասն ուսումնասիրվել են նաև ազատազրկված, միասեռական, մարմնավաճառ, քրիստոնյա կամ սոցիալական ցածր կարգավիճակ ունեցող ծնողների երեխաների հանդեպ խտրականության կիրառման դեպքեր:
Gundem երեխաների միությունը հիմնադրվել է 2005թ. Անկարայում, գործունեության նպատակն է ՄԱԿ-ի «Երեխայի իրավունքների մասին» կոնվենցիայով սահմանված իրավունքների պաշտպանությունը Թուրքիայում:
Լուսանկարը՝ Ալին Օզինյանի անձնական ֆոտոարխիվից
http://civilnet.am/turkey-gundem-report-discrimination-armenian-children/