ԳԱԱ Հայոց ցեղասպանության թանգարան-ինստիտուտի ավագ գիտաշխատող, գիտական քարտուղար, պ.գ.թ. Թեհմինե Մարտոյանի հեղինակազորված թարգմանությամբ լույս է տեսել ԹԵՈՖԱՆԻՍ ՄԱԼԿԻԴԻՍԻ «ՀՈՒՅՆԵՐԻ ՑԵՂԱՍՊԱՆՈՒԹՅՈՒՆԸ. ԹՐԱԿԻԱ, ՓՈՔՐ ԱՍԻԱ, ՊՈՆՏՈՍ» խորագրով մենագրությունը:
Գրախոսներ՝ պ. գ. թ. Եվգենյա Մանուկյան, պ. գ. թ. Մելինե Անումյան, խմբագիր՝ պ. գ. թ. Գևորգ Վարդանյան, սրբագրիչ՝ Մարինե Ամիրյան, 162 էջ:
Թեոֆանիս Մալկիդիսը (Ալեքսանդրուպոլիս, Հունաստան) հույների ցեղասպանությունը վերապրած և Հունաստան տարագրված ընտանիքի զավակ է: Նա հասարակական գիտությունների դոկտոր է, Ցեղասպանագետների միջազգային ընկերակցության անդամ:
Հեղինակի աշխատությունները նվիրված են հույների և հայերի ցեղասպանությունների ուսումնասիրությանը: Պրոֆեսորը ցեղասպանության վերաբերյալ գիտական զեկուցումներով հանդես է եկել Հունաստանի և արտերկրյա գիտաժողովներում, սեմինարներում: Թ. Մալկիդիսը հայերի, հույների և ասորիների ցեղասպանությունների ճանաչման գործընթացում իր ներդրման շնորհիվ բազմիցս արժանացել է պարգևատրումների Հունաստանում և արտերկրում: Հեղինակի ուսումնասիրությունները թարգմանվել են անգլերեն, ֆրանսերեն, հայերեն, ալբաներեն, գերմաներեն, ռումիներեն, ռուսերեն, իսպաներեն և իտալերեն: Նա նաև հունարեն է թարգմանել հայերի և հույների ցեղասպանությունների վերաբերյալ աշխատություններ:
«ՀՈՒՅՆԵՐԻ ՑԵՂԱՍՊԱՆՈՒԹՅՈՒՆԸ. ԹՐԱԿԻԱ, ՓՈՔՐ ԱՍԻԱ, ՊՈՆՏՈՍ» վերնագրով աշխատությունը նվիրված է 1914-1923 թթ. երիտթուրքական և քեմալական վարչակարգերի կազմակերպած և իրականացրած՝ Օսմանյան կայսրության հույն բնակչության զանգվածային տեղահանությունների և ցեղասպանության (Թրակիա, Փոքր Ասիա, Պոնտոս) պատմությանը: Թ. Մալկիդիսը, շարադրելով Հույների ցեղասպանության համապարփակ պատմությունը, հույն ժողովրդի անընկճելի ոգով` լավատեսություն է հաղորդում ընթերցողին՝ հորդորելով չմոռանալ անցյալը և կերտել այնպիսի ապագա, որը կվերականգնի սերունդների ինքնավստահությունն ու արդարության նկատմամբ հավատը:
Akunq.net
Leave a Reply