Սալոնիկի Արիստոտելի անվան համալսարանում կայացած միջազգային գիտաժողովին ցեղասպանագետներ են մասնակցել նաև Հայաստանից

2014 թ. հունիսի 12-ից 14-ը Հունաստանի Հանրապետության Սալոնիկի Արիստոտելի անվան համալսարանի Քաղաքագիտության ֆակուլտետի կազմակերպած միջազգային գիտաժողովին են մասնակցել նաև հայաստանցի գիտնականներ:
«Վայրի Եվրոպա. 1914 թ. օգոստոսից մինչև Շոա» խորագրով միջազգային գիտաժողովին զելուցումներ են ներկայացրել տարբեր երկրներից ժամանած հետազոտողներ, այդ թվում՝ ՀՀ ԳԱԱ հնագիտության և ազգագրության ինստիտուտի առաջատար գիտաշխատող, պատմ. գիտ. դոկտոր Հարություն Մարությանը և ՀՀ ԳԱԱ Հայոց ցեղասպանության թանգարան-ինստիտուտի գիտական քարտուղար, ավագ գիտաշխատող, պատմական գիտությունների թեկնածու Թեհմինե Մարտոյանը:
Հ. Մարությանի զեկուցումը («Ցեղասպանության հիշողությունը և ինքնության փոփոխությունները Հայաստանում 20-րդ դարում. զոհից դեպի մարտիկ») նվիրված էր ցեղասպանության հիշողության գործոնի դերի դիտարկմանը հայերի մեջ 20-րդ դարի ընթացքում։ Մասնավորապես, ներկայացվում էին այն զարգացումները, որն այդ հիշողությունն ունեցել է խորհրդային իշխանության առաջին տասնամ¬յակ¬ներին, հետպատերազմյան տարիներին, 1965 թ., մինչև 1988 թ.-ը և Ղարաբաղյան շարժման/Հայկական հեղափոխության տարիներին, անկախության շրջանում։ Զեկուցման մեջ հատուկ անդրադարձ էր արված Ղարաբաղյան շարժման տարիներին հայոց ինքնության մեջ տեղ գտած փոփոխություններին, որոնք էլ թույլ տվեցին հաղթանակներ արձանագրել Արցախյան ազատագրական պատերազմում։

Թ. Մարտոյանը հանդես եկավ զեկուցման հետևյալ թեմայով. «Բացառելով բնաջնջման հնարավորությունը. Զմյուռնիայի հայ և հույն բնակչության դիրքորոշումն առաջիկա հանցագործությունների նկատմամբ (1922 թ. սեպտեմբեր)»: Նա իր զեկուցման մեջ անդրադարձավ այն հիմնախնդրին, թե ինչո՞ւ 1922 թ. սեպտեմբերին Զմյուռնիայի քրիստոնյա բնակչությունը լայն առումով չպետք է հավատ ընծայեր առաջիկա բնաջնջման սպառնալիքին և առավել ևս ցանկություն դրսևորեր մասնակցելու տեղի ունեցող և արագորեն ծավալվող հանցագործությունների խոչընդոտմանը:
Թ. Մարտոյանի հավաստմամբ՝ իրենց բնաջնջման հնարավորության հավանականությունը բացառած` քաղաքի հայ և հույն քրիստոնյա բնակիչները, անտեսելով իրենց բնաջնջմանը վերաբերող բոլոր նախազգուշացումները, դրանք համարելով ստահոդ տեղեկություններ և ապավինելով քաղաքում տեղակայված եվրոպական պետությունների ներկայացուցիչների համոզիչ հորդորներին, իրականում «ազատ են արձակել» ոճրագործի ձեռքերը և դյուրին դարձրել նախապես ծրագրված գործողությունների անարգել ի կատար ածումը:
Akunq.net