Նավարայի խորհրդարանը ճանաչել է Հայոց ցեղասպանությունը

Իսպանական Նավարա ինքնավար մարզի խորհրդարանը հունիսի 23-ին Հայոց ցեղասպանության ճանաչման հռչակագիր է ընդունել, որում ասվում է, որ «դեպքերը, որոնցից տուժել է հայ ժողովուրդը, իսկական ցեղասպանություն են եղել»:
«Հայոց ցեղասպանության հարյուրամյա տարելիցի մոտենալուն զուգահեռ՝ նման հայտարարությունները պարզ ցույց են տալիս եվրոպացիների կարեկցանքը հայ ժողովրդի եւ նրա տառապանքների նկատմամբ: «Հայաստանի եվրոպացի ընկերներ» կազմակերպությունը հպարտ է, որ իր ընդարձակ ցանցի շնորհիվ, Եվրոպայում ավելի շատ շահագրգիռ կողմեր են գիտակցում այս հարցի կարեւորությունը»,- հայտարարել է կազմակերպության տնօրեն Էդուարդո Լորենցո Օչոան:
Հռչակագիրը դատապարտում է այն ժամանակվա թրքական ռեժիմի քաղաքականությունը, եւ Թուրքիային կոչ անում «դիվանագիտական հարաբերություններ հաստատել Հայաստանի հետ եւ կարգավորել սահմանային վեճը խաղաղ ճանապարհով»: Բացի դրանից, հռչակագրում ընդգծվում է, որ հաշվի առնելով Թուրքիայի՝ ԵՄ-ին անդամակցելու թեկնածուի կարգավիճակը, պետք է հրատապ լուծել այս երկու հարցերը:
http://news.am/arm/news/216075.html