Ադրբեջանում փակեցին գյուլենական կրթական կառույցները

Ադրբեջանում որոշել են փակել բոլոր գյուլենական շարժման ուսումնական կառույցները։ Գյուլենական դպրոցները փակելու տեղեկությունը պաշտոնապես հաստատել է Ադրբեջանի կրթության նախարարությունը։
Գյուլենական ազդեցության դպրոցները մտնում էին Ադրբեջանի միջազգային կրթական համալիրի կազմի մեջ, որն էլ որոշել է փակել իր ենթակայության տակ գտնվող դպրոցները։
Այսպիսով, Ադրբեջանում այսուհետ չեն գործի գյուլենական 10 դպրոց, 1 գիմնազիա, ինչպես նաև «Կովկաս» համալսարանը, որոնք բոլորն էլ գյուլենական ազդեցության կրթօջախներ էին։ Ադրբեջանական լրատվամիջոցներում նշվում է, որ «Կովկաս» համալսարանը, այնուամենայնիվ, կշարունակի գործել։ Ադրբեջանում չեն գործելու նաև «Արազ» (Արաքս) վերապատրաստման կուրսերը, որոնք նույնպես գյուլենականներն էին իրականացնում։
Նշենք, որ Ադրբեջանում գյուլենական կրթօջախները փակելու վերաբերյալ տեղեկություններ էին շրջանառվում այս տարվա սկզբից` Թուրքիայի վարչապետ Թայիփ Էրդողանի և Ֆեթհուլլահ Գյուլենի միջև լարվածության աճին զուգահեռ։ Նշվում էր, որ Էրդողանը խնդրել է Ադրբեջանի ղեկավարությանը փակել այդ երկրում գյուլենական կրթական կառույցները՝ այսպիսով հարվածելով հակառակորդին։
Նշենք, որ Գյուլենն իր գլխավորած և իր անունը կրող հզոր կրոնական/հասարակական շարժումով Էրդողանի գլխավորած Արդարություն և զարգացում կուսակցությանն իշխանության գալու հիմնական աջակիցն է եղել, սակայն վերջին տարիներին Գյուլենի և Էրդողանի միջև ի հայտ եկած տարաձայնությունների պատճառով նախկին դաշնակիցները վերածվել են հակառակորդների։
Նրանց հակամարտությունը առավել սուր բնույթ ստացավ 2013-ի դեկտեմբերին սկիզբ առած կոռուպցիոն սկանդալով։
Հիշեցնենք, որ կոռուպցիոն սկանդալի հետևանքով 2013-ի դեկտեմբերի 17-ին Թուրքիայում ձերբակալվել է 5 տասնյակից ավել մարդ, ինչին հետևել են այս գործի քննությամբ զբաղվող պաշտոնյանների զանգվածային հեռացումները ոստիկանության շարքերից, ինչը համարում են թուրքական կառավարության պատասխան քայլն իրավապահների սկսած գործողությունների դեմ։
Հիմնականում Ստամբուլում անցկացված լայնածավալ գործողության ժամանակ ձերբակալվել էին Թուրքիայի էկոնոմիկայի նախարար Զաֆեր Չաղլայանի, ներքին գործերի նախարար Մուամմեր Գյուլերի և քաղաքաշինության ու շրջակա միջավայրի նախարար Էրդողան Բայրաքթարի որդիները, իրանական ծագմամբ ադրբեջանցի գործարար Ռըզա Զարրաբան, պետական «Հալք» բանկի գործադիր տնօրեն Սուլեյման Ասլանը և այլք։ Նրանք մեղադրվում են Ստամբուլում կաշառքի դիմաց շինարարություն կատարելու, այլ ֆինանսական բնույթի հանցագործությունների համար։ Հայտնի էր դարձել, որ իրավապահները գաղտնալսել են նաև Թուրքիայի նախագահի և վարչապետը հեռախոսները։
Ձերբակալվածներից 25-ի նկատմամբ որոշվել է որպես խափանման միջոց ընտրել կալանքը, իսկ մի մասն ազատ է արձակվել, այդ թվում՝ Բայրաքթարի որդին։
Տեղեկություններ են շրջանառվում, թե այս ձերբակալությունների հետևում կանգնած են գյուլենական շարժման անդամները, ովքեր դժգոհ են իշխող Արդարություն և զարգացում կուսակցության քաղաքականությունից, մասնավորապես, Թուրքիայում գյուլենական դպրոցների փակման նախաձեռնությունից։
Հետաքրքիր է, որ գյուլենական շարժումն ու Արդարություն և զարգացում կուսակցությունն ավելի վաղ հայտնի էին իրենց սերտ հարաբերություններով։
Աղբյուր՝ «Թուրքագիտական պորտալ»
AllTurkey.am