Ստամբուլում հայաստանցի Համբարձում Հարությունյանին սպանել են 11-ամյա որդո՞ւ պատճառով

Ստամբուլի Քումքափը թաղամասին կից ծովափին հունիսի 14-ի գիշերը հայր եւ որդի Համբարձում եւ Գառնիկ Հարությունյաններին դանակահարողին դեռ փնտրում են: Այս մասին NEWS.am-ի հետ զրույցում ասաց Ստամբուլում լույս տեսնող հայկական «Ակoս» թերթի խմբագիր Սարգիս Սերոբյանը:
«Հայաստանցիների միջեւ վիճաբանություն է տեղի ունեցել, երեխայի՝ 11-ամյա Գառնիկի պատճառով է եղել: Թուրքական թերթերը գրում են, թե իբր մաֆիայի հետ կապ ունի, բայց այդպես չէ: Թե ով է դանակահարել, դեռ չեն գտել, թուրքական ոստիկանությունը փնտրում է մեղավորին»,- ասաց նա:
Դեպքը տեղի է ունեցել հունիսի 14-ի գիշերը: Աշխատելու նպատակով Հայաստանից Թուրքիա մեկնած Համբարձում Հարությունյանը որդու հետ գնացել էր ծովափ հանգստանալու, որտեղ էլ վեճի է բռնվել մի խումբ հայերի հետ: Սարգիս Սերոբյանի խոսքով՝ 11-ամյա Գառնիկը թեթեւ մարմնական վնասվածք է ստացել, իսկ Հարությունյանը հիվանդանոց տեղափոխվելիս է մահացել:
«Ոստիկանությունն ըստ երեւույթին արդեն գիտի, թե ով է սպանել, սակայն դեռ չեն հրապարակում: Հայերի համար էլ է դժվար վկայություն տալը, որովհետեւ եթե տան, ուրեմն պետք է վտարվեն երկրից»,- ավելացրեց նա:
Ավելի վաղ NEWS.am-ը, հղում անելով թուրքական Medya73 կայքին, հայտնել էր, որ Ստամբուլում անօրինական ապրող Հայաստանի քաղաքացի Համբարձում Հարությունյանը որդու՝ 11-ամյա Գառնիկ Հարությունյանի եւ մի քանի այլ անձանց հետ Քումքափը թաղամասին կից ծովափում վիճաբանել են: Վիճաբանությունը թեժացել է, որի ընթացքում դանակահարվել են հայր ու որդի Հարությունյանները: 36-ամյա Համբարձում Հարությունյանի կյանքը չի հաջողվել փրկել: Նրա որդին եւ եւս մեկ այլ հայ՝ Մարտին անունով, տեղափոխվել են հիվանդանոց: Մարտինը հայտնել է, թե երեք հոգի իրենց դանակահարել եւ հեռացել են:
http://news.am/arm/news/214655.html