Թուրքերը 1915թ.-ի (Հայոց ցեղասպանության-Ակունքի խմբ.) մասին հոլիվուդյան դերասանների մասնակցությամբ ֆիլմ կնկարահանեն. հայտնի են սցենարի որոշ մանրամասներ

Թուրքիան 1915թ.-ի դեպքերի հարյուրամյակին ընդառաջ կարևոր քայլ է նախաձեռնում, գրում է CNN Turk-ը։
Հոլիվուդյան դերասանուհի Քեյթ Ուինսլեթի մասնակցությամբ նկարահանվելու է «Իմ հոգու դատարկությունը» ֆիլմը, որտեղ հայերից բացի` նաև թուրքերի և քրդերի վերապրածն է երևալու։
Պարբերականը գրում է, որ «1915թ.-ի դեպքերի 100-րդ տարելիցին» ընդառաջ առաջին քայլն արել էր Թուրքիայի վարչապետ Ռեջեփ Թայիփ Էրդողանը՝ առաջին անգամ ցավակցելով զոհված հայերի ժառանգներին։ Հիշեցնենք, որ իր խոսքում Էրդողանը 20-րդ դարասկզբի իրադարձությունների հետևանքով կյանքից զրկված հայերի հոգիներին հանգստություն էր մաղթել, իսկ նրանց թոռներին էլ ցավակցություն հայտնել։
Անկարան, սակայն, այդ քայլով բավարարվել չի պատրաստվում։
Նկարահանվելիք ֆիլմի հիմքում Առաջին համաշխարհային պատերազմի ֆոնին տեղի ունեցող սիրավեպն է։
Սիրավեպի հերոսներից մեկը հայ բուժքույր է, որի կերպարը մարմնավորելու է Քեյթ Ուինսլեթը։ Նրա զուգընկերոջ դերի ամենահավանական թեկնածուն հոլիվուդյան դերասան Մարկ Ուոլբերգն է։
Ֆիլմում ցույց է տրվելու, թե ինչպես էին առաջ Անատոլիայում (Արևմտյան Հայաստանում-Ակունքի խմբ.) թուրքերը, քրդերը, հայերն ու այլ էթնիկ խմբեր ապրում «խաղաղ և բարեկամաբար», և թե ինչպես պատերազմը խաթարեց այդ հանգստությունն ու սկսեցին կռիվները։
Ցույց է տրվելու «ընդհանուր ցավը»։ Հայերի վերապրածից բացի երևալու է նաև թուրքերի և քրդերի զգացած ցավը։
Համաձայն սցենարի՝ դեպքերը տեղի են ունենալու Վան քաղաքում։
Հոլիվուդյան ընկերության կողմից (չի նշվում անունը- Tert.am) նկարահանվելիք ֆիլմի մի մասը նկարահանվելու է Աղթամար կղզում, Արարատի մոտ և Էրզրումում (Կարինում-Ակունքի խմբ.)։
http://www.tert.am/am/news/2014/06/13/genocide-hollywood/