Ստամբուլում կառուցվող հայկական դպրոցը կբացվի սեպտեմբերին

Ստամբուլում 52 տարի անց նորից հայկական դպրոց է կառուցվում: Նոր դպրոցի բացումը կլինի սեպտեմբերին: Դպրոցը կառուցվում է Ստամբուլի Բաքըրքյոյ շրջանում գտնվող Դադյան հայկական նախակրթարանի բակում: Կառուցումն իրականացնում է Սուրբ Աստվածածին եկեղեցու հիմնադրամը, որի նախագահ Մեսութ Օզդեմիրը նշել է, որ 170 տարի առաջ կառուցված Դադյան դպրոցը նախատեսված է եղել սահմանփակ թվով աշակերտների համար և այժմ արդեն չի համապատասխանում պահանջներին:
«Այս պատճառով նոր դպրոց ենք կառուցում: Հին դպրոցի խաղահրապարակը, գրադարանը և ուսուցչանոցը շատ փոքր էին»,- Օզդեմիրի խոսքերը մեջբերել է թուրքական «Ռադիքալ» թերթը: Օզդեմիրը հայտնել է, որ քաղաքապետարանը դպրոցն ազատել էր ծախսերից ու հարկերից, և այդ հարցում համապատասխան որոշումը քաղաքային խորհրդում միաձայն էր ընդունվել:
Հանրապետական շրջանում Թուրքիայում երեք հայկական դպրոց է բացվել: Առաջինը 1953 թվականին Սուրբ Խաչ Դպրեվանք վարժարանն է եղել, երկրորդը՝ 1956-ին Յեշիլքյոյի հայկական նախակրթարանը, իսկ վերջինը՝ 1962-ին կառուցված Սահակյան վարժարանը:
http://ermenihaber.am/?lang_id=2&news_=4&cur_news=1729