Բուենոս Այրեսում Հայոց ցեղասպանության թանգարան կկառուցվի

Հունիսի 10-ին Արգենտինայում ՀՀ դեպանության մասնակցությամբ և Հայ կենտրոնի և Արգենտինայի Հայոց թեմի հովանու ներքո Բուենոս Այրեսի առաջնորդարանի «Սիրանույշ» սրահում տեղի է ունեցել Հայոց ցեղասպանության թանգարանի կառուցման նպատակով Բուենոս Այրեսի քաղաքային իշխանությունների կողմից արգենտինահայ համայնքին անվճար հատկացված հողատարածքի՝ իրավական փաստաթղթերը փոխանցելու պաշտոնական արարողությունը:
Ինչպես հայտնում են ՀՀ արտգործնախարարությունից՝ միջոցառմանը մասնակցել են Արգենտինայում ՀՀ դեսպան Վահագն Մելիքյանը, Բուենոս Այրեսի քաղաքի կառավարության նախարարների խորհրդի ղեկավար Օրասիո Ռոդրիգես Լարետան, Բուենոս Այրեսի քաղաքային խորհրդի՝ Մարդու իրավունքների և մշակութային բազմազանության հարցերով փոխքարտուղար Կլաուդիո Ավրուխը, արգենտինահայ համայնքային կառույցների և եկեղեցիների ղեկավարներ և ներկայացուցիչներ, ակադեմիական և գիտական շրջանակների, ազգային փոքրամասնությունների կառույցների ներկայացուցիչներ:
Իրենց ելույթներում Բուենոս Այրես քաղաքի կառավարության և քաղաքային իշխանությունների ներկայացուցիչներն անդրադարձել են հայ-արգենտինական քաղաքական և մշակութային հարաբերություններին, Արգենտինայում հայ համայնքի դերին ու նշանակությանը՝ կարևորելով համայնքի արժեքավոր ներդրումը երկրի քաղաքական, հասարակական և մշակութային կյանքում:
Անդրադառնալով կառուցվելիք թանգարանի դերին ու նշանակությանը՝ բանախոսները կարևորել են Հայոց ցեղասպանության նահատակների հիշատակը վառ պահելու, նոր սերունդների մեջ մարդու իրավունքների արժեքներ սերմանելու, ինչպես նաև՝ ապագա ցեղասպանությունների կանխարգելման գործում թանգարանի բացառիկ առաքելությունը:
Արգենտինահայ համայնքի անունից Բուենոս Այրեսի կառավարությանն ու քաղաքային իշխանություններին իրենց երախտագիտության խոսքն են հղել Մայր Աթոռ Սուրբ Էջմիածնի գերագույն հոգևոր խորհրդի անդամ, Հայ կենտրոնի նախագահ Ալբերտո Ջերեջյանը, Արգենտինայի Հայոց թեմի առաջնորդ Գերաշնորհ Տեր Գիսակ Արքեպիսկոպոս Մուրադյանը, ինչպես նաև Հայոց ցեղասպանության հիշատակի հիմնադրամի նախագահ Կառլոս Թուֆեկսյանը և հիմնադրամի անդամ Նելիդա Բուլգուրջյանը:
Միջոցառման գեղարվեստական հատվածում ելույթով հանդես է եկել արգենտինահայ երգչուհի Վալերիա Չերեքյանը, ցուցադրվել է 1915–1923թթ. իրականացված Հայոց ցեղասպանության փաստագրության, ինչպես նաև՝ Երևանում գործող Հայոց ցեղասպանության թանգարան-ինստիտուտի մասին պատմող տեսահոլովակ:

http://www.tert.am/am/news/2014/06/11/argentina2/