Դիարբեքիրում իջեցրել են թուրքական դրոշը

Թուրքական անվտանգության ուժերի կողմից սպանված երկու քուրդ երիտասարդների հուղարկավորության ժամանակ՝ հունիսի 8-ին, Դիարբեքիրի նահանգի Լիջեի շրջանում ցուցարարներից մեկը մտել էր Դիարբեքիրի Ռազմաօդային ուժերի զորամաս և իջեցրել Թուքրիայի դրոշը: Ներքին գործերի նախարարությունն աշխատանքից ազատել է զորամասի հսկողության պատասխանատուներին, սկսվել է հետաքննություն, հաղորդում է CNN Turk-ը:
Դրոշի իջեցումից հետո Թուրքիայի բազմաթիվ շրջաններում ցույցեր են տեղի ունեցել, որոնց մասնակիցները պարզել են Թուրքիայի դրոշներ և «հարգանքի տուրք մատուցել» թուրքական դրոշին: T24-ի հաղորդմամբ՝ Ստամբուլում հազարավոր ցուցարարներ են հավաքվել Մեջիդիյեքոյում և շարժվել Թաքսիմ կենտրոնական հրապարակ, սակայն ոստիկանությունը ցուցարարներին թույլ չի տվել մուտք գործել հրապարակ:
Ցույցերը կազմակերպել են Թուրքիայի «Ազգայնական շարժում» կուսակցությունը և կուսակցության հովանավորության տակ գտնվող «Գաղափարապաշտների օջախները», որոնք դրոշի իջեցումը համարում են անջատողականության դրսևորում:
Ցույցերի ընթացքում հնչել են «Թուրքական դրոշն իջեցնողի ձեռքը կկտրենք», «Թուրքիայի պատիվն անարգողի լեզուն կկտրենք», «Երանի իրեն թուրք կոչողին», «Թուրքիան թուրքինն է, թուրքինն էլ կմնա», «Շեհիթներն անմահ են, հայրենիքը՝ անբաժանելի» և այլ կարգախոսներ:
Թուրքական դրոշի խնդիրը դարձավ նաև Թուրքիայի քաղաքական օրակարգի մաս: Թուրքիայի «Ազգայնական շարժում» կուսակցության ղեկավար Դևլեթ Բահչելին խիստ է արձագանքել դրոշի իջեցմանը և մեղադրել Թուրքիայի վարչապետ Ռեջեփ Թայիփ Էրդողանին և Զինված ուժերի գլխավոր շտաբին: Ըստ Zaman-ի՝ Բահչելին ասել է՝ «կորչի թուրք-քրդական խաղաղության գործընթացը», իսկ վարչապետ Ռեջեփ Թայիփ Էրդողանը, ըստ Today’s Zaman-ի, սպառնացել է, որ կայազոր մտնողն ու դրոշն իջեցնողը «թանկ կվճարի»:
Թուրքական դրոշի իջեցման մեջ բոլորը մեղադրում են Քրդստանի աշխատավորական կուսակցությանը, մինչդեռ նրա ղեկավար և քուրդ ժողովրդի առաջնորդ հռչակված Աբդուլլահ Օջալանը դրոշի իջեցումը սադրանք է համարել: Ըստ Firat գործակալության՝ Օջալանն ասել է. «Դրոշի հետ կապված սադրանքը, որը նպատակ է հետապնդում մեզ հակադրել Թուրքիայի ժողովրդին, պետք է երկու կողմերի համապատասխան կառույցների կողմից անհապաղ հետաքննվի և արդյունքները ներկայացվեն ժողովրդին»:
Միջադեպը արձագանք է գտել նաև սոցիալական ցանցերում: Այսպես՝ Facebook-ի օգտատերերն իրենց էջերին տեղադրել են թուրքական դրոշի նկարներ, իսկ Twitter-ում հայտնվել են գրառումներ՝ #BayrağımaSaygısıOlmayana («Իմ դրոշը չհարգողին»), #BayrakSereftir («Դրոշը պատիվ է») , #Turkbayragi («Թուրքական դրոշ»), #bayrakinmez («Դրոշն անհնար է իջեցնել») հեշթեգերով: Twitter-ում տարածված հեշթեգերից մեկն էլ՝ #LicedeKatliamVar, որը թարգմանաբար նշանակում է «Լիջեում կոտորած է», տարածել են նրանք, ովքեր պնդում են, որ Լիջեի շրջանում թուրքական ուժերը բռնություն են գործադրում ժողովրդի նկատմամբ:
http://civilnet.am/diyarbakir-turkish-flag-removal-protests-lice/