Ծպտյալ հայերը զանգվածային լրատվամիջոցներում

Մեհմեդ Շևքեթ Էյգի
Զանգվածային լրատվամիջոցներում բավականաչափ հայեր կան: Նրանց մի մասը մեկ ինքնություն ունեցող հայեր են, որոնց անունները հայկական են, իսկ կրոնը` կամ Հայ առաքելական, կամ կաթոլիկ, կամ էլ բողոքական: Աթեիստ կամ մարքսիստ եղողներ էլ կլինեն ամենայն հավանականությամբ…
Կան այնպիսիք, որոնց թուրքերենը և մշակույթը ես գնահատում եմ:
Մեկ էլ կան ծպտյալ հայերը, որոնք երկու ինքնություն ունեն. արտաքուստ մուսուլման են, սակայն նրանց իսկական ինքնությունը հայկական է: Ո’չ, ես անուններ չեմ տա. ոչ դրա իրավունքն ունեմ, ոչ էլ ուզում եմ խառնակչություն հրահրել:
Այդ ծպտյալ հայերի մի մասը խիստ կործանարար գործունեություն է ծավալում:
Ոմանք արտաքուստ ալևի են երևում: Ալևիականությանն էլ են վնաս հասցնում:
Թուրքիայում այլևս բավականաչափ ազատություն կա: Երանի թե նրանք թողնեն իրենց երկակի ինքնությունը և վերադառնան իրական ինքնությանը:
Երջանկահիշատակ Հրանտ Դինքն այդպես էր արել:
«Թյուրքիե» օրաթերթի 2012 թ. փետրվարի 9-ի համարում տպագրված` «Հայերը վերադառնում են իրենց ինքնությանը» վերնագրով հրապարակման մեջ ներկայացվում են մեկ ինքնությամբ մեր այն հայ քաղաքացիները, որոնք դատական որոշմամբ թողել են թուրքական կամ քրդական, մահմեդական ինքնությունները…
Օսմանյան կայսրության ժառանգորդ Թուրքիայի Հանրապետությունը բազմազանության ցուցասրահ էր:
Գլխավոր ինքնությունը թուրքիացիությունն է:
Ըստ խոսակցությունների` ներկայում 78 ցեղ ու ժողովուրդ կա:
Բնակչության մի մասը երկու ինքնություն ունի:
Ծպտյալ հրեաները` դյոնմե (կրոնափոխ-Ակունքի խմբ.) կոչվող, սակայն դավանափոխ չեղած սաբաթայականները… Սաբաթայական չեղող ծպտյալ հրեաները… Իսկ Բագրատունիներին հրեա՞ ենք, համարելու, թե՞ հայ:
Մեր երկրում ապրող ծպտյալ հրեաների ընդանուր թիվը մեկ միլիոնից քիչ չէ:
Դարձյալ առնվազն մեկ միլիոն ծպտյալ քրիստոնյա կա:
Թուրքիան ապահովության մեջ չի լինի, քանի դեռ չի լուծել այդ ծպտյալների խնդիրը:
Սոմայի հանքահորում տեղի ունեցած ողբերգական դեպքից հետո այնտեղ արտաքուստ ալևի համարվող խմբեր ուղարկվեցին. խառնակչություն հրահրելու փորձ եղավ:
Գեզի այգու իրադարձությունների հեղինակները սուննի մահմեդակա՞ն են… ալևի՞ են, թե՞ ծպտյալ:
Ծպտյալներին ի տես` ջայլամի պես` գլուխը ավազի մեջ թաղելով, ոչ մի լուծման չենք հանգի:
Միլիոնավոր ծպտյալները Թուրքիայի դառը և խրթին իրականությունն են:
Հրեաները, հայերը հույները, մյուս ոչ մուսուլման տարրերը Օսմանյան կայսրության միլլեթների համակարգում ապրել և գոյատևել են խաղաղության ու կրոնի և ինքնության ազատության մեջ:
Գաղութարար պետություններն այդ հպատակներին թշնամացրել են պետության նկատմամբ, պետությունը կործանվել է, նրա փոխարեն աշխարհիկ հանրապետական ռեժիմ է հիմնվել, և բոլորը տակնուվրա են եղել:
Ուղղափառ հույներն Օսմանյան պետության համակարգում երկրորդ միլլեթն էին` մուսուլմաններից հետո:
Եթե օսմանյան համակարգը պահպանված լիներ, այսօրվա մեր սահմանների ներսում առնվազն 5 միլիոն հույն կապրեր… Դարձյալ առնվազն 5 միլիոն հայ կբնակվեր…
Հույների և հայերի մի մասը, ոչ բոլորը, անսացին իմպերիալիստ, գաղութարար պետություններին, միսիոներներին, կտրեցին այն ճյուղերը, որոնց վրա նստած էին, և վայր ընկան: Նրանք սխալ ձիու գավակին նստեցին և խաղը կորցրեցին:
Աշխարհիկ ֆաշիստական ռեժիմը կործանեց ոչ միայն հույներին և հայերին, այլ նաև` սուննիների մի մասին:
Ալևիներին էլ հանգիստ չթողեցին:
Երանի~ թե հայերը շարունակեին հավատարիմ հպատակ լինել:
Երանի~ թե օսմանյան քաղաքացի` Իզմիրի հույն մետրոպոլիտ Խրիսոստոմոսը թշնամի հունական բանակին չընդուներ և չօրհներ, օսմանցիների կողմը բռներ:
Երանի~ թե Օսմանյան պետությունը չպարտվեր Առաջին աշխարհամարտում:
Երանի~, երանի~, երանի~… Ա~խ այս երանիները:
http://www.milligazete.com.tr/koseyazisi/Medyadaki_Kripto_Ermeniler/20212#.U5AVsvl_uVg
Թարգմանեց Մելինե Անումյանը
Akunq.net