Ալեն Դելոնի մասնակցությամբ Ցեղասպանության մասին ֆիլմին ի պատասխան Թուրքիան ևս ֆիլմ կնկարահանի

Թուրքիայի ազգային մեծ ժողովի արտաքին հարաբերությունների հարցերի մշտական հանձնաժողովը «Հայոց ցեղասպանության պնդումների» հարցով հատուկ օրակարգով հանդիպում է իրականացրել, տեղեկացնում է թուրքական Haberturk կայքը։
Հանձնաժողովի նիստի ընթացքում քննարկվել են «1915թ.-ի դեպքերի» 100-ամյակին ընդառաջ հայկական սփյուռքի ներկայացուցիչների կատարելիք քայլերն ու Թուրքիայի հնարավոր պատասխան քայլերը։
Հանձնաժողովի անդամները նշել են, որ հայկական լոբբին մեծ բյուջե ունեցող մի ֆիլմ է պատրաստվում նկարահանել, ինչին ի պատասխան նման նախաձեռնությամբ հանդես կգա նաև թուրքական կողմը։ Թուրքական ֆիլմը կանվանվի «Մեր սրտի վերքը»։ Նկարահանումներն սկսվելու են մի քանի ամսից՝ Իզմիրում։
Ընդդիմադիր պատգամավոր Սինան Օղանը, սակայն, նկատել է, որ ֆիլմի անվանումը Հայկական հարցի հետ որևէ կապ չունի։ «Սիրային ֆիլմ է հիշեցնում»,-ասել է նա։
Հայկական լոբբին 1915թ.-ի դեպքերի 100-ամյակին ընդառաջ մտադիր է ֆիլմ նկարահանել, որը մեծ արձագանք կստանա, գրում է աղբյուրը։ Հայտնի ռեժիսոր, սցենարիստ Սթիվեն Սփիլբերգին արդեն առաջարկ է ներկայացվել։ Հայկական ֆիլմը կկոչվի «Վիրավորը»։
Համաձայն թուրքական լրատվամիջոցի տեղեկությունների՝ ֆիլմում 1869թ.-ին Քութահյայում ծնված Սողոմոն Սողոմոնյանի՝ Կոմիտասի դերը կկատարի աշխարհահռչակ դերասան Ալեն Դելոնը։
Ենթադրվում է, որ ֆիլմում դեր կունենա նաև Դասթին Հոֆմանը, իսկ ֆիլմի երաժշտության հեղինակը կլինի ամերիկահայ հայտնի ռոք երաժիշտ Սերժ Թանկյանը։
http://www.tert.am/am/news/2014/06/06/genocide-film/