ՄԻԵԴ-ը կլսի Փերինչեքի գործով Շվեյցարիայի բողոքը

Մարդու իրավունքների եվրոպական դատարանը (ՄԻԵԴ) համաձայնել է լսել Շվեյցարիայի կառավարության բողոքն ընդդեմ Դողու Փերինչեքի գործով ՄԻԵԴ-ի կայացրած վճռի, հաղորդում է Le Matin թերթը:
Այն, որ Շվեյցարիայի կառավարությունը մտադիր է դիմել ՄԻԵԴ՝ Դողու Փերինչեքի գործը Մեծ պալատի կողմից վերանայելու պահանջով, հայտարարվել էր մարտի 11-ին:
Հայցի մեջ ասված է, որ «գործի վերանայմամբ կհստակեցվի այն շրջանակը, որի սահմաններում շվեյցարական իշխանությունները հնարավորություն ունեն կիրառել ռասիզմի դեմ պայքարի քրեական օրենքը»:
2007թ. մարտի 9-ին թուրք ազգայնական Դողու Փերինչեքը Շվեյցարիայի Վո կանտոնի դատարանի կողմից ենթարկվել էր ինչպես ֆինանսական, այնպես էլ քրեական պատասխանատվության Հայոց ցեղասպանությունը ժխտելու համար: Վո կանտոնի դատարանը և Դաշնային գերագույն դատարանը մերժել էին մարտի 9-ի դատավճռի դեմ ներկայացված բողոքը: 2013թ. դեկտեմբերի 17-ի իր որոշման մեջ ՄԻԵԴ-ի իրավասու պալատը որոշում էր կայացրել, ըստ որի՝ շվեյցարական դատարանի վճռով խախտվել է բողոքարկողի ինքնաարտահայտման ազատությունը:
Մարդու իրավունքների եվրոպական դատարանի՝ Թուրքիայի Աշխատավորական կուսակցության ղեկավար Դողու Փերինչեքի գործով կայացրած որոշման կապակցությամբ իրենց մտահոգությունն էին հայտնել աշխարհի տարբեր երկրներում ապրող ավելի քան երեսուն ցեղասպանագետներ և պատմաբաններ, որոնք փետրվարի 14-ին բաց նամակ էին ուղղել Շվեյցարիայի արդարադատության և ոստիկանության դեպարտամենտի ղեկավար Սիմոնետա Սոմարուգային: Վերջինիս բաց նամակով դիմել էր նաև Թուրքիայի Մարդու իրավունքների ասոցիացիան:
http://civilnet.am/echr-hear-swiss-appeal-perincek-ruling/