Չեք ամաչո՞ւմ, որ Թուրքիայի նախագահն եք. Հարվարդում հարցրել են Գյուլին

Թուրքիայի նախագահ Աբդուլլահ Գյուլը Հարվարդի համալսարանում տարածաշրջանի վերաբերյալ կոնֆերանսի ժամանակ մի մասնակցի սուր հարցերի հետեւանքով հայտնվել է բավականին տհաճ իրավիճակում։
Թուրքական Haberler-ի փոխանցմամբ՝ Հարվարդի համալսարանի դասախոսներից Էմրե Ալթընդիշը կոնֆերանսի ժամանակ հարց է ուղղել Թուրքիայի նախագահ Աբդուլլահ Գյուլին՝ շեշտելով, որ նման հարցերի համար Թուրքիայում իրեն կձերբակալեին։
«Նախորդ տարի այս ժամանակ ձեր ղեկավարած պետությունը Գեզիում սպանեց 8 քաղաքացու, 90-ին վիրավորեց, 9 քաղաքացի կորցրեց աչքը, հազարավոր քաղաքացիներ խեղդվեցին արցունքաբեր գազից։
Թուրքիայում այսօր օրական սպանվում է 3 կին, 4 բանվոր մահանում է աշխատանքի վայրում ոչ աշխատանքային պայմանների հետեւանքով։ Ձեր ղեկավարած երկրի զինվորները Ռոբոսկիում սպանեցին 34 քաղաքացու, որոնցից 17-ը երեխաներ էին։ Ինչպե՞ս եք մեզ այստեղ ժողովրդավարության դասեր տալիս։ Չեք ամաչո՞ւմ, որ նման պետության ղեկավար եք։ Ինչպե՞ս եք գիշերները քնում։ Խնդրում եմ, հարցս անպայման թարգմանեք»,-ասել է Էմրե Ալթընդիշը։
Այս հարցից հետո ամբողջ սրահում գտնվողները շունչները պահել են, իսկ հարցի հետեւանքով տհաճ իրավիճակում հայտնված Աբդուլլահ Գյուլը պատասխանել է, որ հարց տվող դասախոսը ստում է, եւ նման դեպքեր ամեն երկրում էլ լինում են։
http://news.am/arm/news/212068.html