Մի ձեռքով տալիս են, մյուսով` փորձում հետ վերցնել. «Ակօս»-ը՝ Թուրքիայում հայապատկան գույքը հայ համայնքին վերադարձնելու մասին

Թուրքիայում իշխող Արդարություն և զարգացում կուսակցությունը մի ձեռքով վերադարձնում է հայապատկան հին շինությունները, իսկ մյուս ձեռքով փորձում է դրանք հետ վերցնել հայ համայնքից, ահազանգում է «Ակօս»-ը։
Անգամ կիսատ, անցյալի տեսքից շատ տարբերվող կառույցների վերադարձը պատմական անարդարության վերականգնման հարցում նոր մոտեցում էր խորհրդանշում, ինչն անտեսել հնարավոր չէ։
2015թ.-ի նախաշեմին Հայոց ցեղասպանությանն առնչվող «արդար հիշողությունը» պետական քաղաքականություն է դառնում, և այդ արդարության վերականգնման համար ունեցվածքի վերադարձն էլ կարող է արժեք ունենալ, գրում է թերթը։
Սակայն անցյալի անարդարությունների բուժման ու փոխհատուցման հարցի համար ոչ թե անցողիկ, այլ մնայուն լուծումներ է պետք գտնել, քանի որ այդ ընթացքում բազմաթիվ խնդիրներ են առաջանում։
Հիմնադրամների ընդհանուր տնօրինության որոշմամբ, Սուրբ Փրկիչ հայկական եկեղեցուն վերադարձված հողատարածքը հետ ստանալու համար Զեյթինբուրնուի շրջանը դատարան է դիմել։
Պետության կողմից գրավված այդ ունեցվածքի իրական տերը Սուրբ Փրկիչ հիվանդանոցն է, սակայն քաղաքապետարանը բողոքարկում է այն համայնքին վերադարձնելու որոշումը։
Այսինքն՝ այդ դեպքն իրականում նշանակում է այն, որ ԱԶԿ-ն մեկ ձեռքով տվել, իսկ մյուսով փորձում է հետ վերցնել այն, գրում է թերթը։
Այդ անշարժ գույքը բարեգործական Սուրբ Փրկիչ հիվանդանոցի համար կենսական նշանակություն ունի։ Այդ հիվանդանոցը ոչ միայն հայերի, այլև առանց կրոնական և էթնիկ ինքնությանը նայելու` օգնության կարիք ունեցող յուրաքանչյուր անձի է օգնում։
«Հուսանք՝ վաղը Զեյթինբուրնուի քաղաքապետարանի այդ քայլը որպես տհաճ հուշ կմնա։ Նման խնդիրներ չունենալու համար առգրավված ողջ ունեցվածքն առանց նախապայմանների պետք է վերադարձվի, և վնասի փոխհատուցման համար քայլեր պետք է ձեռնարկվեն»,- եզրափակում է «Ակօս»-ը։
http://www.tert.am/am/news/2014/05/29/surp-prgich/