Հայկ Դեմոյանի հարցազրույցը Հունաստանում. Թուրքիայի կողմից Հայոց ցեղասպանության ճանաչումը կլինի երկարատեւ ու ցավոտ

Հայոց ցեղասպանության ճանաչումը կախված է Թուրքիայի դեմոկրատիզացիայից, նշանակում է, կլինի երկարատեւ ու ցավոտ գործընթաց: Այդ մասին հայտարարել է Ցեղասպանության թանգարանի տնօրեն, պատմաբան Հայկ Դեմոյանը հունական «Տո Վիմա» («Քայլ») պարբերականին տված հարցազրույցում՝ կապված Պոնտոսի հույների ցեղասպանության տարելիցի հետ: Հայաստանն ու Հունաստանը պետք է միավորեն ջանքերը ցեղասպանությունը ժխտողների դեմ պայքարում: «Երկու ժողովուրդներին միավորում է զոհերի հիշատակը: Եթե մենք միավորվենք, պատմության ժխտումը դժվարին կլինի»,- հավելել է Դեմոյանը:
Ժամանակակից Թուրքիան, նշել է նա, ամեն կերպ թաքցնում է հույների, հայերի եւ ասորիների ցեղասպանությունը: Այդ երկրում մարդկանց համար դժվար է ընդունել, որ իրենց նախնիները հանցանք են գործել. քանի որ այդ դեպքում պետք կլինի ընդունել, որ թուրքական պետությունը կառուցվել է ցեղասպանության վրա:
Թուրքիայում այլ ձայներ են հնչում, սակայն միայն Կոստանդնուպոլսի մտավորական վերնախավի շրջանում: «Պետք չէ միամիտ լինել. Թուրքիայի կրթական համակարգը դաստիարակում է դաժան ազգայնականների: Ցեղասպանության ճանաչումը կախված է Թուրքիայի դեմոկրատիզացիայից, նշանակում է, կլինի երկարատեւ ու ցավոտ գործընթաց»,- հավելել է պատմաբանը:
Այնուամենայնիվ նա մեծ հույսեր ունի` կապված թուրք երիտասարդության հետ, որը հոգնել է ստից ու ռեժիմի քարոզից: «Նոր սերունդը պետք է երկիրը ներսից փոխի՝ լայն մատծողությամբ մարդկանց ուժերով, ովքեր պատրաստ են երկխոսության ու հաշտեցման»,- հավելել է Դեմոյանը:
Այն հարցին, թե ինչ է մտածում նեոնացիզմի «ոսկի մայրամուտի» մասին, Դեմոյանը հիշեցրել է, որ նման շարժումների հանդեպ հանդուրժողականությունն անթույլատրելի է: «Երբ 1938թ.-ին Չեմբերլենը հայտարարեց. «Ես խաղաղություն բերեցի», ի՞նչ հետեւեց այդ խաղաղությանը: Հիտլերն Օբերզալցբերգում ասաց. «Ո՞վ է այժմ հիշում հայերի մասին»: Եվ սկսվեցին կոտորածները Լեհաստանում»:
Հոլոքոստի կամ ցեղասպանության ժխտումը ոչ մի ընդհանրություն չունի խոսքի ազատության հետ: Դա հանցագործություն է, որը ոտնահարում է զոհերի հիշատակը: Նա, ով հերքում է այն, թող հիմնավորի: Այլապես նա հանցագործ է, հավելեց պատմաբանը:
http://news.am/arm/news/210915.html