«Հիշում եմ եւ պահանջում». Հայտնի է Հայոց ցեղասպանության 100-րդ տարելիցին նվիրված խորհրդանիշը եւ կարգախոսը

Մայիսի 26-ին Հայոց ցեղասպանության թանգարան-ինստիտուտում մեկնարկել է ՀՀ Սփյուռքի նախարարության եւ Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի կողմից կազմակերպված՝ Հայոց ցեղասպանության 100-րդ տարելիցին նվիրված միջոցառումները համակարգող տարածաշրջանային հանձնախմբերի ղեկավարների եւ ներկայացուցիչների հավաք-հանդիպումը:
Սփյուռքի նախարարության մամուլի ծառայությունից հայտնում են, որ հավաք-հանդիպման մասնակիցներն այցելել են Ծիծեռնակաբերդի հուշահամալիր եւ ծաղկեպսակ դրել Հայոց ցեղասպանության զոհերի հուշակոթողին:
Հավաք-հանդիպմանը բացման խոսքով հանդես է եկել ՀՀ Նախագահի աշխատակազմի ղեկավար, պետական հանձնաժողովի անդամ, Ցեղասպանության 100-րդ տարելիցին նվիրված միջոցառումների համակարգող Վիգեն Սարգսյանը:
ՀՀ Նախագահի աշխատակազմի ղեկավարը շնորհակալություն է հայտնել հավաք-հանդիպման մասնակիցներին, ովքեր աշխարհի տարբեր երկրներից հավաքվել են մասնակցելու եւ իրենց ուրույն ներդրումը բերելու Ցեղասպանության 100-րդ տարելիցին նվիրված աշխատանքները կազմակերպելուն ինչպես Հայրենիքում, այնպես էլ՝ Սփյուռքում:
Վիգեն Սարգսյանը կարեւորել է այն հանգամանքը, որ այս հավաքն արդեն իսկ տեղի է ունենում թանգարան-ինստիտուտի նորակառույց վարչական շենքում:
ՀՀ Նախագահի աշխատակազմի ղեկավարը վստահություն է հայտնել, որ Ցեղասպանության 100-րդ տարելիցին նվիրված միջոցառումների ընդգրկումները տպավորիչ են լինելու:
Վ. Սարգսյանը տեղեկացրել է, որ ս.թ. մարտին կայացած տարածաշրջանային հանձնաժողովների ներկայացուցիչների հանդիպումից հետո հաստատվել են Հայոց ցեղասպանության 100-րդ տարելիցին նվիրված խորհրդանիշը եւ կարգախոսը: Որպես խորհրդանիշ ընդունվել է անմոռուկ ծաղիկը, որը աշխարհի բոլոր լեզուներով թարգմանվում է՝ չմոռացվող: Կարգախոսն է՝ «Հիշում եմ եւ պահանջում»:
Վիգեն Սարգսյանը տարածաշրջանային հանձնաժողովներին կոչ է արել համադրել ջանքերը եւ իրականացվող բոլոր միջոցառումները արձանագրել, ներկայացնել եւ լուսաբանել հավուր պատշաճի:
Այնուհետեւ ելույթ է ունեցել ՀՀ Սփյուռքի նախարար Հրանուշ Հակոբյանը՝ ներկայացնելով նախարարության կողմից Հայոց ցեղասպանության 100-րդ տարելիցի շրջանակներում իրականացվող աշխատանքները:
ՀՀ Սփյուռքի նախարարը նշել է. «100 տարի առաջ Օսմանյան կայսրության նպատակն էր՝ թողնել մեկ հայ եւ այն էլ՝ թանգարանում: Հայերն այսօր ունեն երկու պետություն եւ օտար ափերում հիմնադրված ու հայանպաստ գործունեություն իրականացնող հայահոծ հզոր համայնքներ»:
Ներկայացնելով Հայոց ցեղասպանության միջազգային ճանաչման եւ դատապարտման եւ հետեւանքների վերացման ողջ ընթացքը եւ ձեռքբերումները՝ նախարարն ընդգծել է, որ նույնիսկ Թուրքիայում իրավիճակի հստակ փոփոխություն է նկատվում:
«Ուզում եմ առանձնահատուկ ընդգծել մեր երկու կաթողիկոսների համայնքային պահանջատիրական կեցվածքը, որն իր անուրանալի դերակատարությունն է ունեցել հարցի վերհանման գործում»,- նշել է Հակոբյանը:
Նախարարը շեշտել է, որ ՀՀ Սփյուռքի նախարարության կողմից վերջին 3 տարիների ընթացքում Ցեղասպանության թեմայով կազմակերպվել է 18 համաժողով եւ գիտաժողով, որոնց մասնակցել է շուրջ 3000 գիտնական, իրավաբան, փորձագետ եւ այլ մասնագետներ Սփյուռքից: Անցնող 3 տարիների ընթացքում պատվիրվել է 17 հետազոտություն:
«Մեր մեծերը» ծրագրի շրջանակներում նախարարությունը կազմակերպել է Հայոց ցեղասպանությանը զոհ գնացած հայ մտավորականներին, գրողներին նվիրված միջոցառումներ Հայաստանում, Սփյուռքի տարբեր համայնքներում, «Կոմիտաս Վարդապետ» փառատոնի շրջանակներում մի քանի օր շարունակ Սփյուռքից ժամանած երգչախմբերն ու երաժշտախմբերը ներկայացրել են Կոմիտասի երգերը, կազմակերպվել են Ցեղասպանության թեմայով շարադրությունների մրցույթներ, մրցանակաբաշխություններ, քայլեր են ձեռնարկվել Ցեղասպանության թեմայով բուհերում մագիստրոսական թեզերը պատրաստելու ուղղությամբ:
Ողջունելով հավաք-հանդիպման մասնակիցներին թանգարան-ինստիտուտի նորակառույց վարչական շենքում՝ Հայոց ցեղասպանության թանգարան-ինստիտուտի տնօրեն Հայկ Դեմոյանը նշել է, որ շենքի ամբողջական գործարկումից հետո հնարավոր կլինի այցելուներին ներկայացնել 2,5 անգամ ավելի ցուցադրություն: Բացի այդ, թանգարան-ինստիտուտը հանդես կգա նոր՝ գիտաճանաչողական, կրթադաստիարակչական առաքելությամբ:
Հայկ Դեմոյանը կոչ է արել մասսայականացնել սկսված շարժումը, թանգարանի գիտական ֆոնդերի եւ նոր ցուցադրության համալրման համար թանգարան-ինստիտուտին նվիրատվության կարգով կամ պատճենահանման պայմանով տրամադրել Ցեղասպանությունից տուժած ընտանեկան լուսանկարներ եւ փաստաթղթեր, վերապրողների հուշագրություններ եւ բանավոր պատմությունների ձայնագրություններ, ընտանեկան մասունքներ:
Զեկուցումներով հանդես են եկել տարածաշրջանային հանձնախմբերի ներկայացուցիչները՝ Ֆրանսիայի հանձնախմբի ազգային պատասխանատու Ալեքսի Գովչյանը, Փարիզի Ֆրանսահայ կազմակերպությունների համակարգող խորհրդի համանախագահ Արա Թորանյանը, Ռումինիայի Հայոց միության նախագաh, սենատոր Վարուժան Ոսկանյանը, Երուսաղեմի Հայոց պատրիարքության միաբան Հայր Կորյուն վրդ. Բաղդասարյանը, Բրազիլիայի հանձնախմբի նախագահ Անդրե Կիսաջիքյանը, ՀՅԴ Հարավային Ամերիկայի Կենտրոնական կոմիտեի ներկայացուցիչ Խաչիկ Տեր-Ղուկասյանը, Լիբանանի Հայոց ցեղասպանության 100-ամյակի Կենտրոնական մարմնի ատենապետուհի Սեդա Խդըշյանը եւ այլք: Նրանք ներկայացրել են Հայոց ցեղասպանության 100-րդ տարելիցին նվիրված՝ տարածաշրջաններում իրականացված միջոցառումները եւ առաջիկա անելիքները:
http://m.news.am/arm/news/211181.html