Ստամբուլում հայկական նոր դպրոց է կառուցվում

Ստամբուլի հայ համայնքը Թուրքիայի Հանրապետության պատմության մեջ առաջին անգամ նոր դպրոց է կառուցում։
Ինչպես տեղեկացնում է թուրքական Haber 10 կայքը, Ստամբուլի Բաքըրքյոյ թաղամասում կառուցվող դպրոցի նոր շենքը սեպտեմբերից իր դռները կբացի աշակերտների առաջ։ Դպրոցը նախատեսված կլինի 500 աշակերտների համար։ 
Օսմանյան կայսրության տարիներին Ստամբուլում բազմաթիվ հայկական դպրոցներ կային։ Հանրապետության հիմնադրումից հետո դրանք մեկը մյուսի հետևից փակվեցին։ 
Այժմ Ստամբուլում 19 հայկական դպրոց կա, որոնցից 6-ը պատկանում է կաթոլիկ համայնքին։ Դպրոցներում սովորող աշակերտների ընդհանուր թիվը 3000 է։ Հայկական դպրոցի կառուցման ծախսերը հոգում է Պոլսի հայ համայնքը։
Սուրբ Աստվածածին եկեղեցու հիմնադրամի տնօրեն Մեսութ Օզդեմիրը մեկնաբանել է նոր դպրոց կառուցելու անհրաժեշտության մասին լուրը։ «Մեր դպրոցը 170 տարեկան էր։ Մենք 400 աշակերտ ունենք, որոնց ցանկանում ենք ավելի լավ, ժամանակակից և արդիական հնարավորություններ ունեցող դպրոցում կրթել»,-ասել է նա։
Նա նշել է, որ դպրոցի պատմական շենքում արդեն անգամ մեկ մեխ մեխել չէին կարողանում։

http://www.tert.am/am/news/2014/05/25/stambul-school/