Երիտասարդութիւնը եւ Ցեղասպանութեան 100-ամեակը

Ուրբաթ, մայիսի 2-ին Հայ ճարտարապետների եւ ճարտարագէտների միութեան հաւաքատեղիում կայացաւ կլոր սեղան՝ նւիրւած Մեծ Եղեռնի 99-րդ տարելիցին: Ձեռնարկը կազմակերպել էր միութեան Երիտասարդական միաւորը՝ «Երիտասարդութիւնը եւ Ցեղասպանութեան 100-ամեակը» ընդհանուր խորագրով: Այդ խորագրի տակ ներկայացւեցին երկու զեկոյցներ, իւրաքանչիւրի շուրջ բազմակողմանի արտայայտութիւններ ծաւալւեցին եւ աշխոյժ մթնոլորտ ստեղծւեց:
Ուրբաթ, մայիսի 2-ին Հայ ճարտարապետների եւ ճարտարագէտների միութեան հաւաքատեղիում կայացաւ կլոր սեղան՝ նւիրւած Մեծ Եղեռնի 99-րդ տարելիցին: Ձեռնարկը կազմակերպել էր միութեան Երիտասարդական միաւորը՝ «Երիտասարդութիւնը եւ Ցեղասպանութեան 100-ամեակը» ընդհանուր խորագրով: Այդ խորագրի տակ ներկայացւեցին երկու զեկոյցներ, իւրաքանչիւրի շուրջ բազմակողմանի արտայայտութիւններ ծաւալւեցին եւ աշխոյժ մթնոլորտ ստեղծւեց:
Կլոր սեղանը վարում էր Երիտասարդական միաւորի անդամ ճրտգ. Արազ Խուդաբախշեանը:
Առաջին նիւթը՝ «Ցեղասպանութեան հիմնական դրդապատճառները եւ հետագայ զարգացումները» ներկայացրեց միաւորի անդամ ճրտգ. Արթին Խուդաբախշեանը: Ըստ զեկուցաբերի՝ հայ եւ թուրք տարրերի միջեւ առկայ մշակութային տարբերութիւնը, թուրք ղեկավարութեան կողմից թուրքական միատարր մշակոյթ ստեղծելու, նաեւ հայութեան տարածքներին եւ ունեցւածքին տիրանալու ձգտումները, հայութեան ակնկալիքները քրիստոնեայ Եւրոպայից, ապա քաղաքական ուժերի մութ համաձայնութիւնները հիմնական այն ազդակներն են, որոնց արդիւնքում՝ հայութիւնը ենթարկւեց աննախադէպ սպանդի:
Զեկուցաբերը այնուհետեւ անդրադարձաւ Սեւրի դաշնագրին ու Վիլսոնեան Հայաստանի սահմանագծին, «Նեմեսիս» գործողութեանը, որով պատժւեցին ջարդարարների պարագլուխները, Հայ Դատի յանձնախմբերի տարած գործունէութեանը՝ տասնամեակների ընթացքում, Հայոց Ցեղասպանութեան ճանաչման ու դատապարտման գործընթացին՝ տարբեր երկրների կողմից մինչեւ մեր օրերը:
Երկրորդ զեկուցաբերն էր ճրտգ. Արթուր Յովսէփեանը, որը ներկայացրեց հետեւեալ թեման՝ «Ներկայ կացութեան գնահատումը եւ ապագայի հեռանկարները»: Նա իւրաքանչիւր հայի մօտ ազգային գիտակցութիւնն ու ազգային հեռանկարի առկայութիւնը համարեց այն հիմնական ազդակը, որ կը ճշտորոշի նրա ուղին դէպի Հայ Դատի արդար լուծումը: Այդ ուղղութեամբ կարեւորեց հայապահպանումը, դէպի Երկիր հայեացքը եւ ամուր հիմքերով պետականութեան կերտումն ու պահպանումը:
Զեկուցաբերը ազգ ձեւաւորող տարրերը բնորոշեց որպէս՝ լեզու, գրականութիւն, մշակոյթ, պատմութիւն: Անդրադարձաւ նաեւ ներքին ու արտաքին սպառնալիքներին: Ներքին սպառնալիքները համարեց ապաքաղաքականացումը, յուսալքումը եւ ազգային գիտակցութեան ու արժէքների կորուստը, իսկ արտաքին սպառնալիքը՝ Թուրքիայի, Իսրայէլի ու մեծ պետութիւնների ծրագրերը, այդ թւում նաեւ արտագաղթը, որ աղաւաղում է մեր ժողովրդի ազգային դիմագիծը:
Վերջում զեկուցաբերը շեշտեց, որ պիտի հզօրացնել ազգային գիտակցութիւնը, դիմակայել սպառնալիքներին եւ միշտ վառ պահել պահանջատիրութեան ջահը:

Նիւթը՝ Է. Յ.-ի

http://alikonline.ir/hy/news/community/item/17603-Երիտասարդութիւնը–եւ–Ցեղասպանութեան-100-ամեակը