Թուրքիայում շարունակվում է Կերմուշի հայկական եկեղեցու ավերումը

Ուրֆայի կենտրոնից 10 կմ հեռավորությամբ գտնվող Կերմուշ (տեղացիների կողմից Կամրջի վերափոխված ձևը) գյուղի եկեղեցին թալանվում է, ահազանգում է «Ակօս» պարբերականը՝ «Ենիուրֆա» թերթին հղումով։

Տարածքում շինարարական աշխատանքներ են սկսվել, և նոր շենքեր են կառուցվում։ Թեև եկեղեցու շրջակայքը Թուրքիայի մշակույթի նախարարության կողմից զբոսաշրջության զարգացման կենտրոնի է վերածվել, սակայն եկեղեցու վիճակը շարունակում է ցավալի մնալ։

Գյոբեքլի թեփե կոչվող հնագիտական բլրի մերձակայքում գտնվող Կերմուշ գյուղում կառուցված հայկական եկեղեցին երկար տարիներ որպես ախոռ է օգտագործվել։

Զբոսաշրջության զարգացման տարածք հռչակվելուց հետո եկեղեցին անցյալ տարի մաքրվել է, սակայն այժմ էլ գանձ որոնողների թիրախում է հայտնվել։

Եկեղեցու չորս կողմում փորված փոսերը լուրջ վնասներ են պատճառում շինությանը։ Գյուղի ճանապարհները ևս անխնամ են։
Համաձայն վկայությունների՝ Կերմուշում մինչև 1915թ.-ը բնակվել է շուրջ 1000 հայ։ Դրանից հետո հայաթափված գյուղում անցյալ տարի առաջին անգամ կրոնական արարողություն է տեղի ունեցել։
Տեղի բնակիչները նշում են, որ իրենք անզոր են կողոպտիչների դեմ պայքարում։

Գեղարվեստի պատմության դասախոսներից Ջիհադ Գյուրքջիօղլուն և քաղաքային խորհրդի ղեկավար Սաբրի Դիշլին ցավ են հայտնում սրբավայրի պահպանման հարցում նման թերացումների համար։

Կերմուշի եկեղեցին 2011թ. ընտրությունների ընթացքում ներառվել էր իշխող Արդարություն և զարգացում կուսակցության նախընտրական՝ «4 տարի 400 նախագիծ» գրքույկում՝ առաջիկայում վերանորոգվելիք պատմական ժառանգության կազմում։
Եկեղեցու հուշաքարն անհետացել է, ուստի դժվար է դրա հիմնադրման մասին փաստացի վկայություններ ունենալ։ Սակայն տեղացի ժողովրդի շրջանում ավանդազրույց է տարածված, համաձայն որի եկեղեցին 7 եղբայրներ են կառուցել՝ հրաժարվելով այլոց օգնությունից։

http://www.tert.am/am/news/2014/05/16/kermush-church/