Թուրքիայում ապաստանած քեսաբահայերն արդեն Բեյրութի ճանապարհին են

Սիրիայում մոտ երեք տարի շարունակվող պատերազմի ընթացքում Քեսաբից տեղահանված հայերի համար նոր փուլ է սկսվում, տեղեկացնում է «Ակօս»-ը։

Մարտի 31-ից ապրիլի 5-ը Յայլադաղը սահմանադռնից Թուրքիա տեղափոխված հայերը հյուրընկալվել էին Վաքըֆլը գյուղում։

Այժմ 18 քեսաբահայերից բաղկացած խումբը Պոլսո հայոց պատրիարքարանի, Բեյրութում հայկական եկեղեցու և Թուրքիայի ԱԳՆ-ի միջնորդությամբ տեղափոխվում է Բեյրութ։ Նրանք արդեն ճանապարհին են։

«Սիրիայի Լաթաքիա քաղաքում գտնվող իրենց հարազատներին ու ազգականներին հասնելու հույսը կորցրած քեսաբցիները տեղափոխվում են Բեյրութ, և դա նրանց կյանքի նոր սկիզբն է լինելու»,- գրում է «Ակօս»-ը։

Մի քանի օր առաջ Բեյրութից եկած լավ լուրը նրանց թե՛ ուրախացրել, թե՛ հուզել էր. նրանք վերջապես միանալու են իրենց հարազատներին, սակայն իրենց 40 օր հյուրընկալած Վաքըֆլըի հայ գյուղացիներից բաժանվելու հուզմունքն են զգում։

Եվս 6 հոգու փաստաթղթերը դեռ պատրաստ չեն, և նրանք դեռ պետք է սպասեն։

Վաքըֆլըում կազմակերպված հրաժեշտի արարողությունը հուզիչ է եղել։ Գյուղ առաջինը եկած Սրբուհի և Սաթենիկ Թիթիզյան քույրերից բացի, Բեյրութ են մեկնում նաև Քեսաբում իրենց զավակին՝ Գևորգին, կորցրած 6 հոգանոց Ջուրյան ընտանիքը, հալեպահայ Անահիտ տատիկն ու Ներսես հորեղբայրը, Մարթա և Մովսես Արաբյան քույր ու եղբայրը, որպես Վաքըֆլըի Վիլյամ Սարոյան ճանաչված Սերոբ հորեղբայրը, գիշեր-ցերեկ աշխատող Ծովիկ քույրիկը, անցյալ շաբաթ 89-ամյակը նշած Հակոբ հորեղբայրն ու եղբայրը՝ Վազգենը, սենյակից դուրս չեկող Զավեն հորեղբայրը

Քեսաբցի հյուրերից բաժանվելը դժվար էր նաև Վաքըֆլըի բնակիչների համար։ Նրանց միակ մխիթարությունն այն է, որ քեսաբահայերը Բեյրութում իրենց ազգականներին են հանդիպելու։

http://www.tert.am/am/news/2014/05/15/kesab-beirut/