Ժողովուրդների դեմոկրատիա կուսակցության համանախագահներից Սաբահաթ Թունջելը Թուրքիային մեղադրել է Ռոբոսկի բնակավայարում քրդերի կոտորած կազմակերպելու մեջ, որի ժամանակ սպանվեցին 34 խաղաղ բնակիչ: Քուրդ գործիչը ցավով արձանագրել է, որ մինչև օրս դեռ անպատիժ են մնացել նշյալ կոտորածն իրականացնողները:
Հիշեցնենք, որ Իրաքի հետ սահմանակից Շրնաք նահանգի Ուլուդերեյի (Ռոբոսկի) շրջանում 2011-ի դեկտեմբերի 28-ի երեկոյան թուրքական օդուժի F-16 կործանիչները ռմբակոծել էին Իրաքից Թուրքիա մաքսանենգ ապրանք ներկրող մի խմբի: Ավելի ուշ պաշտոնական Անկարան պարզաբանել էր, թե քաղաքացիական անձանց շփոթել է ՔԲԿ – PKK-ի զինյալների հետ: Այդ ռմբակոծության հետևանքով սպանվել էր 34 քուրդ երիտասարդ: Նրանք Ուլուդերե շրջանի գյուղերի բնակիչներ էին:
Թունջելը նաև նշել է, որ գալիք ժամանակները դժվար են լինելու, բայց այդ դժվարությունները լինելու են հանուն ինքնավար Քուրդիստանի և Թուրքիայի ժողովրդավարացման:
«Մենք արդեն ոչ թե պահանջելու ենք ինքնավար Քուրդիստան, այլ կառուցելու ենք այն: Մենք մեր լեզվով ու մշակույթով ինքնակառավարվելու ենք: Նպաստելու ենք, որ Թուրքիան ևս փոխվի»:
Ներկայացնելով քրդերի բանտարկյալ առաջնորդ Աբդուլլահ Օջալանի հետ ունեցած վերջին հանդիպումը` Թունջելը հավաստիացրել է, որ քրդական հարցի լուծման բանակցությունները շարունակվում են, և իրենք ամեն հնարավորն անելու են` ռազմական գործողություններ վերսկսումը կանխելու համար:
«Թուրքիայի հետ միասին ժողովրդավարացվելու ենք, Միջին Արևելքի ժողովուրդների հետ պայծառ ապագա ենք ստեղծելու»,- նշել է քուրդ կուսակցականը:
Leave a Reply