ՀՀ ԱԺ փոխնախագահը` Թուրքիայի ԱԳ նախարարին` Հայոց ցեղասպանությունը թուրքական կայսրության ամոթն ու խայտառակությունն է

Ժողովրդի ցավը ոչ թե թաղել է պետք, այլ` բուժել եւ հետեւանքները վերացնել: Հայոց ցեղասպանությունը հայ եւ թուրք ժողովուրդների ընդհանուր ցավը չէ, դա մարդկային ողբերգություն եւ թուրքական կայսրության ամոթն ու խայտառակությունն է: NEWS.am–ի թղթակցի հետ զրույցին նման հայտարարությամբ է հանդես եկել ՀՀ ԱԺ փոխնախագահ, ՀՀԿ խմբակցության մամուլի քարտուղար Էդուարդ Շարմազանովը` մեկնաբանելով Թուրքիայի ԱԳ նախարար Ահմեդ Դավութօղլուի հայտարարությունը:

Շարմազանովի խոսքով, ցավը բուժելու եւ հետեւանքները վերացնելու համար Թուրքիան ձեւական բնույթ կրող հայտարարությունների փոխարեն պետք է Գերմանիայի օրինակին հետեւի, պետք է ընկալի, որ հայ ժողովուրդն իր երկրի տարածքում ցեղասպանության զոհ է դարձել: «Թուրքիան պետք է ընկալի, որ դա հայերի համար հայրենիքի կորուստ էր եւ դադարեցնի հարեւանների հետ վերջնագրերով խոսելու քաղաքականությունը: Եվ ամենակարեւորը, Թուրքիան պետք է դադարեցնի կասկածի տակ առնել Հայոց ցեղասպանության պատմական իրողությունը: Միջազգային հանրությունը վաղուց արդեն ընդունել է այն»,- նշել է ԱԺ փոխնախագահը:

Շարմազանովը նաեւ Թուրքիայի ԱԳ նախարարին ուղղված հիշեցում է արել առ այն, որ օսմանյան դատարանը մահապատժի վճիռ է կայացրել Հայոց ցեղասպանության կազմակերպիչների նկատմամբ, որն ի կատար է ածվել «Նեմեսիս» կազմակերպության անդամների կողմից:

Հիշեցնենք` Թուրքիայի արտաքին գերատեսչության ղեկավարը հայտարարել էր. «Վիճաբանություններն այն մասին, թե ինչու եւ ինչպես է պատահել հայկական ողբերգությունը, այսօր շարունակում է բազմաթիվ հայերի ու թուրքերի տանջել: Ցավի, տառապանքների, զրկանքների եւ նշանակալի թվով զոհերի մասին համայնքային ու ազգային հիշողությունները շարունակում են հայ եւ թուրք ժողովուրդներին միմյանցից հեռու պահել:

Ազգային հիշողությունները կարեւոր են: Բայց չե՞ն կարող արդյոք հայկական եւ թուրքական պատմագրությունները մերձենալ միմյանց, չի՞ կարող արդյոք «արդարացի ճշմարտություն» ծնվել: Հավատք ունենալով, որ դա հնարավոր է, Թուրքիան առաջարկել է 1915թ. իրադարձություններն ուսումնասիրելու համար թուրք եւ հայ պատմաբանների համատեղ հանձնաժողով ստեղծել, որի եզրահանգումներն այդ ողբերգական ժամանակահատվածի ճիշտ ըմբռնման կբերեն եւ, հուսով եմ, կօգնեն մեր հարաբերությունների կարգավորմանը»:

http://news.am/arm/news/207703.html