Թուրքական պատմագիտական ընկերությունը «Հայերն ու թուրքերը պատմության մեջ» վերնագրով 35 հատորանի գիրք է պատրաստել, որի առաջին 10 հատորի շնորհանդեսը տեղի է ունեցել օրերս: Ընկերության նախագահ Մեթին Հյուլագյուն նշել է, որ գրքի ստեղծման վրա աշխատել է 350 գիտնական: «Գրքում խոսվում է թուրքերի և հայերի միասնության մասին: Մեր մշակույթում պատերազմելը ամենավերջին ընտրությունն է: Վարչապետի ուղերձն էլ մարդկային զգացմունքները առաջ բերող մի հայտարարություն էր»,-նշել է Հյուլագյուն:
35 հատորից բաղկացած գրքում տեղ են գտել մի շարք պատմաբանների հոդվածներ, որոնք վերաբերում են տարբեր թեմաների: Գրքում ներկայացված է պատմության թուրքական մեկնաբանությունը` համեմված իրենց կեղծարարություններով:
Այդ տեսանկյունից ներկայացված են նախնադարում և միջնադարում հայերի ապրելակերպը, սոցիալ-տնտեսական կյանքը, հայերը կենտրոնում և գավառներում, բնակչության թիվը, եկեղեցիները, միսիոներները, հայության գաղթը, Հայկական հարցի միջազգայնացման գործընթացը:
«Այս գրքում փորձել ենք ներկայացնել, թե հայերը երբ են եկել պատմական ասպարեզ և այսօր ինչ վիճակում են, թուրքերի և հայերի միջև երբ են երկկողմ հարաբերություններ ձևավորվել: Ընդհանուր առմամբ 35 հատոր ենք նախատեսել: 6-7 հատորը կթարգմանվի անգլերեն, հնարավոր է` թարգմանվի նաև ֆրանսերեն, գերմաներեն և ռուսերեն»,-պատմել է Հյուլագյուն՝ նշելով, որ հաջորդ 10 հատորը կհրատարակվի հոկտեմբեր ամսին, իսկ մնացած մասը՝ 2015 թ. հունվարին: Վերջինս նշել է նաև, որ գրքի ստեղծման աշխատանքներին ակնկալել են հայ պատմաբաններին մասնակցությունը, սակայն արձագանք չեն ստացել:
Ankakh.com
Leave a Reply