ՀՀ նախագահի դրամաշնորհային ծրագրի շրջանակներում կուսումնասիրվեն Թուրքիայում կրոնափոխ հայերի խնդիրները

Արեւմտահայաստանի եւ արեւմտահայության հարցերի ուսումնասիրության կենտրոնում ՀԵՀ-ի՝ որպես ՀՀ նախագահի կողմից գործընկեր կազմակերպության հայտարարած «Հայության խնդիրներն ու իրավունքները Թուրքիայի հանրապետությունում» անվանակարգով դրամաշնորհի շրջանակում «Հասարակություն եւ մշակույթ» ՀԿ-ն ապրիլի 26-ին կազմակերպեց սեմինար՝  «Թուրքական իշխանությունների վերաբերմունքը կրոնափոխ հայության նկատմամբ» թեմայով:

Արեւմտահայաստանի եւ արեւմտահայության հարցերի ուսումնասիրության կենտրոնի ղեկավար Հայկազուն Ալվրցյանը, ով համագործակցում է «Մշակույթ և հասարակություն» ՀԿ-ի հետ նշեց. «ՀՀ նախագահի աշխատակազմի կողմից տրամադրվող դրամաշնորհը կօգնի մեզ մեր գործը հասցնելու իր հանգրվանին: Մեր նպատակն է պատրաստել մի ամբողջական հրատարակություն` Թուրքիայում հայերի իսլամացման պատճառների մասին, նրանց ունեցած ներկայիս դժվարությունների մասին»:

Պարոն Ալվրցյանը նշեց, որ մեկնելու են  Արևմտյան Հայաստան, զրուցելու են կրոնափոխ հայերի հետ, ուսումնասիրելու նրանց մասին հրատարակված հոդվածները,  ուսումնասիրության արդյունքները ներկայացնելու են մեկ հրատարակությամբ` գրքի տեսքով, որը թարգմանվելու է նաև թուրքերեն:

ԵՊՀ Արևելագիտության ֆակուլտետի փոխդեկան Ռուբեն Մելքոնյանը նկատեց, որ իսլամացած հայերի խնդիրը միշտ համարվել է հայ գիտության ամենաքիչ ուսումնասիրված բաժիններից մեկը: Բայց վերջին տարիներին այդ բացը ահագին լրացվել է: Նա մանրամասնեց. «Կան մի շարք գիտական հոդվածներ, գրքեր: Սա ամենահրատապ խնդիրներից մեկն է, քանի որ գործ ունենք հայության մի շերտի հետ, որը հեռու է իր կրոնից և սովորույթներին, բայց նրանց մեծ մասը հավատարիմ է մնացել իր արմատներին: Թուրքիայում 50-60 հազար հայ կա, և մեկ միլիոնի հասնող կրոնափոխ հայեր: Այլ բան է, որ մենք գործ ունենք 50-60 հազար հայի հետ, մեկ այլ բան, երբ գործ ունենք մեկ միլիոն պլյուս հիսուն հազար  հայի հետ: Այդ հայերն ապրում են հայկական տարբեր հատվածներում, և նրանք կարող են տեղերում հայկականության պահպանման համար խթան հանդիսանալ»:

Անդրադառնալով կրոնափոխ հայերի խնդիրների ուսումնասիրության կարևորությանը` պարոն Մելքոնյանը նշեց. «Կրոնափոխ հայերը Թուրքիայում ցեղասպանության ուղղակի ապացույցներն ու շարունակականությունն են, դա մի ապացույց է, որը թուրքական կողմի համար ժխտելը ուղղակի անհնար է»:

Спортивное питание: Ваш путь к здоровью, энергии и достижениям