Քալիֆորնիայի օրենսդրական ժողովը բանաձեւ է ընդունել` ի պատիվ հայերին օգնություն ցուցաբերած ամերիկացիների

Ամերիկյան Քալիֆորնիա նահանգի օրենսդրական ժողովը միաձայն բանաձեւ է ընդունել` ի պատիվ Մերձավոր Արեւելքի օգնության Կոմիտեի ակնառու ծառայության եւ այն ամերիկացիների, որոնց օգնությամբ Օսմանյան կայսրությունում Հայոց ցեղասպանությունից մազապուրծ փրկված 132 հազար որբ երեխաներ մարդասիրական օգնություն են ստացել: Այս մասին NEWS.am-ի թղթակցին հայտնել են Ամերիայի Հայ Դատի գրասենյակի արեւմտյան բաժնի մամուլի ծառայությունից:

Մուտքի խոսքում բանաձեւի նախագծի հեղինակ, օրենսդրական ժողովի անդամ Յան Կալդերոնը Մերձավոր Արեւելքի օգնության Կոմիտեի գործունեության ֆոնն է ներկայացրել` նշելով, որ այն Միացյալ Նահանգների Կոնգրեսի կողմից լիազորություններ ստացած ամենահին ոչ կառավարական մարդասիրական կազմակերպությունն է եղել, որի նախաձեռնությամբ ավելի քան հազար ամերիկացի կամավորներ թողել են իրենց հարմարավետ կյանքը եւ ամբողջ աշխարհը շրջագայել` օգնության տրամադրման ջանքերում իրենց ներդրումն ունենալու համար: Նրանք ավելի քան 132 հազար որբ երեխաներ եւ 1 մլն փախստականներ են փրկել, ինչպես նաեւ 117 միլիոն դոլարի չափով օգնություն հավաքել եւ ըստ նշանակության տրամադրել: Խորհրդարանականի խոսքով, Քալիֆորնիայում այդ գործողությունները ղեկավարել են պետական պաշտոնատար անձինք, ինչպիսիք են Սան-Ֆրանցիսկոյի քաղաքապետ Ջեյմս Ռոլֆ-կրտսերը եւ Կոմիտեի` Քալիֆորնիա նահանգի ղեկավար, դատավոր Կերտիս Վիլբուրը:

Ելույթի ավարտին Յան Կալդերոնն արժեվորել է ANCA-ի արեւմտյան բաժնի կողմից կազմակերպված, «Ամերիկա, մենք շնորհակալ ենք քեզ. հայերի տուրքը Մերձավոր Արեւելքի օգնության կոմիտեին» անվամբ քարոզարշավը` ասելով, որ այն նպատակ ունի երախտագիտություն հայտնել այն օգնության համար, որի արդյունքում բազմաթիվ հայեր փրկվել են Ցեղասպանությունից:

http://news.am/arm/news/206422.html