Բողոքի ցույց՝ Իրանում Թուրքիայի դեսպանության առջև. «Էրդողանի հայտարարությունը չի կարող արդարացնել հայերի պահանջները»

«Իրանահայերը Թեհրանում Թուրքիայի դեսպանության առջև բողոքի ցույց են անցկացրել»,-այդ մասին հաղորդում է իրանահայ համայնքի «Հայելի.քոմ» կայքը:

Համաձայն տեղեկատվության՝ այսօր առավոտյան Թեհրանի ս. Սարգիս եկեղեցում Հայոց Ցեղասպանության զոհերի հոգիների խաղաղության համար տեղի է ունեցել հոգեհանգստյան արարողություն, որից հետո պատարագի մասնակիցները քայլերթով շարժվել են դեպի Թուրքիայի դեսպանություն:

Իրանի Մեջլիսի հայազգի պատգամավոր Կարեն Խանլարյանը, Թուրքիայի դեսպանատան առջև ունեցած ելույթի ընթացքում անդրադառնալով նախօրեին Թուրքիայի վարչապետ Ռեջեփ Թայիփ Էրդողանի ունեցած ելույթին, նշել է. «Էրդողանի հայատարարությունը հնարավոր է ինչ-որ տեղ «դրական» քայլ համարել, սակայն այնուամենայնիվ այդ հայտարարությունը չի կարող արդարացնել հայ ժողովրդի պահանջները»:

Հանրահավաքին ելույթով հանդես է եկել նաև Թեհրանի Հայոց Թեմի առաջնորդ Սեպուհ արքեպիսկոպոս Սարգսյանը: Նա դատապարտելով Թուրքիայի կողմից իրականացված ոճրագործությունները՝ հայտարարել է, որ ճշմարտությունը չի կարելի թաքցնել, քանի որ ի վերջո արդարությունն է հաղթելու:

Ցույցի ավարտին մասնակիցները ողջ աշխարհին, մասնավորապես Իրանին կոչ են արել ճանաչել և դատապարտել Հայոց ցեղասպանությունը, այնուհետև ընթերցված պահանջագիր-բանաձևը հանձնել են Թուրքիայի դեսպանությանը:
Բողոքի ցույցն ավարտվել է «Սարդարապատ» երգով:

http://www.panorama.am/am/popular/2014/04/24/iran-turkey/?sw