Թուրքիայում ոգեկոչեցին Հայոց ցեղասպանության զոհերի հիշատակը

99 տարի անց Թուրքիայի Ստամբուլ, Անկարա և Դիարբեքր քաղաքներում ոգեկոչեցին Հայոց ցեղասպանության զոհերին, Ստամբուլից հաղորդում է  Akunq.net-ի թղթակիցը:
Այս տարի արդեն չորրորդ անգամ Ստամբուլում տեղի ունեցավ ցեղասպանության զոհերի հիշատակի ոգեկոչման արարողություն: Ոգեկոչման միջոցառումները մեկնարկեցին Հայդարփաշա երկաթուղային կայարանից, որտեղից 1915 թ. ապրիլի 24-ին մահվան երթի էին ուղարկվել 220 հայ մտավորականներ: Միջոցառման մասնակիցները կրում էին հայ մտավորականների նկարները: Հայդարփաշա կայարանում ելույթ ունեցան Թուրքիայի մարդու իրավունքների ասոցիացիայի, «Ոչ ասա խտրականությանն ու ռասիզմին» միության, Հայկական բարեգործական ընդհանուր միության, Եվրոպական ժողովրդական հակառասիստական շարժման ներկայացուցիչները:

Այնուհետև Շիշլիի հայկական գերեզմանատանը հարգանքի տուրք մատուցեցին Սևակ Շահին Բալըքչին, ով երեք տարի առաջ ապրիլի 24-ին սպանվեց բանակում: Միջոցառումների շարքն ավարտին հասավ Թաքսիմում:  Ֆրանսիայի դեսպանատան առջև՝ Իսթիքլալ պողոտայի սկզբնամասում, հավաքվել էին Թուրքիայի քաղաքացիներ, սփյուռքից ժամանած հայեր: Միջոցառման ժամանակ կազմակերպիչները մեկ առ մեկ նշեցին երկրի երեսից բնաջնջված հայկական բնակավայրերի ու մահվան երթի ուղղարկված հայ մտավորականների անունները: Ողջ ընթացքում հնչում էին հայկական հոգևոր և ժողովրդական երգեր: Միջոցառումը, որը տևեց գրեթե մեկ ժամ, ավարտվեց կազմակերպիչների՝ հաջորդ տարի նույն տեղում հանդիպելու և Ցեղասպանության 100-րդ տարելիցը սգալու կոչով:

Միջոցառման ժամանակ Ժողովրդի փրկության կուսակցության մոտ 2 տասնյակ անդամ` դրոշներով, մի փոքր հեռվից վանկարկումներով հանդես եկան: Ոստիկանությունը թույլ չտվեց, որպեսզի երկու խմբերի միջև բախում լինի:  

Ոգեկոչման միջոցառումներ են տեղի ունեցել նաև Դիրաբեքիրում և Անկարայում:  Անկարայի կենտրոնական պողոտայում կազմակերպված միջոցառմանը մասնակցել են Խաղաղություն և ժողովրդավարություն կուսակցության ասորի պատգամավոր Էրոլ Դորան, «Իսմայիլ Բեշիքչի» հիմնադրամի նախագահ Բեշիքչին: Միջոցառման մասնակիցները «Ճանաչել Հայոց Ցեղասպանութունը» խորագրով ցուցապաստառի առջև ընթերցել են մամլո հաղորդագրություն:

Akunq.net