Թուրքիայի Խաղաղություն և ժողովրդավարություն կուսակցության Գերագույն մարմնի հայտարարությունը

24-ը ապրիլի 2014 թ.

Հարգանքով խոնրահվում ենք Մեծ եղեռնի ժամանակ զոհվածների հիշատակի առաջ

Այսօր մարդկության պատմության ամենամեծ ողբերգություններից մեկ`1915 թ. Հայոց ցեղասպանության ոգեկոչման օրն է: Ուղիղ 99 տարի առաջ` 1915 թ. ապրիլի 24-ին, սկսվեց 20-րդ դարի ամենամեծ ցեղասպանություններից մեկը` հայ մտավորականների աքսորով: Հայ ժողովուրդը մեծ ցավեր է ապրել տվյալ ժամանակաշրջանի` Միություն և առաջադիմություն կուսակցության կառավարության մութ քաղաքականության հետևանքով, պոկվել է Անատոլիայի և Միջագետքի ժողովուրդներից, իր հայրենի հողից:

Այս ցեղասպանության ցավը մեկ հարյուրամյակից ի վեր ներկայում էլ է շարունակվում` թե’ միջազգային հանրության և թե’ եղբայր ժողովուրդների խղճում խորը վերքեր թողնելով:

Ցեղասպանության տրավման և ցավերը պահպանվում են հասարակական հիշողություններում, որովհետև Թուրքիան` պետությամբ և իր ժողովուրդներով, չի առերեսվել 20-րդ դարի ամենամեծ ցեղասպանություններից մեկի հետ, հաշվի չի նստել սեփական պատմության հետ, ներում չի հայցել հայ ժողովրդից` ցեղասպանության փաստն ընդունելով: Չպետք է մոռացության տրվի այն, որ պատմության հետ առերեսումն ու հաշվի նստելը միևնույն ժամանակ երաշխիք կլինեն առ այն, որ տառապանքներն այլևս չեն կրկնվի:

Չառերեսված պատմության հետևանքները ծանր են լինում: Չլուսաբանված յուրաքանչյուր դեպք հիմք է ստեղծել նորերի համար. 1915-ին տեղի ունեցածին մյուս դեպքերն են հետևել: Միություն և առաջադիմություն կուսակցությունը եթե անգամ պատմության գիրկն է անցել, նրա սնած մտայնությունը ի հայտ է եկել Դերսիմի, Աղրըի, Մարաշի, Չորումի, Սվասի և Ռոբոսկիի կոտորածների դեպքում: Դրանք սեփական անցյալի հետ առերեսվելուց, ժողովուրդների հետ հաշվի նստելուց խուսափած պաշտոնական գաղափարախոսության և պետական կառուցվածքի հետևանքներն են:

Թեև ժողովուրդների ժողովրդավարական պայքարը պետության ազգայնամոլ մտայնության դեմ պայքարել է, սակայն այսօր ևս շարունակվում են տարբեր ինքնությունների, մշակույթների և հավատքների դեմ ուղղված սպառնալիքները: Սակայն Թուրքիայի ժողովուրդների` զարգացող ժողովրդավարական լուծման ընթացքում մեկ անգամ ևս նկատելի խաղաղության, եղբայրության և ազատության հիմքերի վրա դրված համատեղ կամքը հույս են ներշնչում, թե նման դեպքերն այլևս չեն կրկնվի:

Հայոց ցեղասպանության հետ առերեսումը, հաշվի նստելը կարևոր են մեր ապագայի տեսանկյունից, եղբայրաբար միմյանց վերաբերվել կարողանալու հանգստության տեսանկյունից: Անհնար է համատեղ ապագա կառուցել ցավալի պատմությամբ:

Թուրքիայի պետությանը կոչ ենք անում Միություն և առաջադիմություն կուսակցության կառավարության` մարդկայնության դեմ գործած հանցագործությունների հետ առերեսվելով` հաշվի նստել այդ ոճիրների հետ և ներում հայցել մեծ ցավեր կրած հայ ժողովրդից, հարգանքով խոնարհվում ենք Հայոց ցեղասպանության զոհերի հիշատակի առաջ` նոր տառապանքներ չլինելու հույսով:

Խաղաղություն և ժողովրդավարություն կուսակցություն

Թարգմանեց Մելինե Անումյանը

 Akunq.net