Հայոց Ցեղասպանութեան իրողութիւնը իրանական պետական–քաղաքական ու մտաւորական լսարանին ծանօթացնելու եւ հայ ժողովրդի պահանջատիրական ձայնը լսելի դարձնելու նպատակով՝ տարիներ է, ինչ կազմակերպւում է բանախօսականգեղարւեստական ծրագիր:
«ԱԼԻՔ», Կ. Դաւթեան – Հայոց Ցեղասպանութեան իրողութիւնը իրանական պետական-քաղաքական ու մտաւորական լսարանին ծանօթացնելու եւ հայ ժողովրդի պահանջատիրական ձայնը լսելի դարձնելու նպատակով՝ տարիներ է, ինչ կազմակերպւում է բանախօսականգեղարւեստական ծրագիր:
Այդ անհրաժեշտութիւնից ելնելով՝ Հայոց Մեծ Եղեռնի 99-րդ տարելիցի ծրագրերի շարանում՝ Թեհրանի Հայ Դատի յանձնախումբ՝ «ՀՈՒՍԿ» հաստատութեան նախաձեռնութեամբ եւ Հայոց հասարակական միութեան (Հայ ակումբ) համագործակցութեամբ երէկ՝ երեքշաբթի, ապրիլի 22-ի երեկոյեան Հայ ակումբի սրահում կազմակերպւել էր ծրագիր՝ «Անպատիժ մնացած ոճրագործութիւն» խորագրով:
Իրանի պետական հիմներգով մեկնարկած միջոցառման բացման խօսքն ընթերցեց եւ միջոցառումը հանդիսավարեց իրաւաբան Թալին Բանդարին:
Բացման խօսքում հակիրճ բացատրութիւններ տրւեցին Հայոց Ցեղասպանութեան մասին եւ նշւեց, որ 20-րդ դարի առաջին ցեղասպանութիւնը անպատիժ թողնելով՝ առիթ տրւեց հետագայ ցեղասպանութիւնների իրագործման համար եւ նշւեց. «Հայոց Ցեղասպանութեան 100-ամեակի սեմին համայն հայ ժողովուրդը, առաւել ամրակուռ ու վճռական, պահանջում է իր արդար իրաւունքների իրականացումը»: Մէջբերում կատարւեց նաեւ Իրանի նախագահ դոկտ. Հասան Ռոհանիի կողմից ՄԱԿ-ի 68-րդ վեհաժողովում ներկայացւած նախագիծ՝ «Աշխարհը ի դէմ բռնութեան ու ծայրայեղութեան» բանաձեւից, որը հաստատւեց ՄԱԿ-ի կողմից, եւ յոյս յայտնւեց, որ արդարութեան իրագործումով եւ ոճրագործներին պատժելով՝ հնարաւոր է խաղաղութիւն եւ անվտանգութիւն հաստատել աշխարհում:
Այնուհետեւ ցուցադրւեց փաստա-վաւերագրական տեսաֆիլմ, որը ոչ միայն խօսում էր Հայոց Ցեղասպանութեան պատմական իրականութեան եւ ժամանակին աշխարհի տարբեր թերթերում, ինչպէս Իրանում լոյս տեսնող թերթերում Ցեղասպանութեան մասին, այլեւ՝ ներկայում Թուրքիայի եւ Ադրբեջանի որդեգրած հակահայ քաղաքականութեան վերաբերեալ, որը յանգեցրեց՝ Հրանտ Դինքի սպանութեան, Սումգայիթի կոտորածներին եւ այսօր Սիրիայի Քեսաբի հայերի տեղահանութեանը: Երեկոյին որպէս բանախօս՝ հրաւիրւեց՝ արտայայտւելու Իսլ. խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանը:
Նա իր արտայայտութիւնների ընթացքում նշեց, որ ոչ միայն ի մի ենք եկել՝ գլուխ խոնարհելու նահատակների յիշատակի առջեւ, այլեւ՝ վերալիցքաւորելու մեր խղճերը:
Պատգամաւորը կարեւորութեամբ անդրադարձաւ աշխարհում Թուրքիայի կողմից կիրառւող Հայոց Ցեղասպանութիւնը ժխտելու քաղաքականութեանը եւ ոչ պատշաճ դիւանագիտական մօտեցումներին, որով փորձում են կաշառել պետական-քաղաքական, որը միշտ չէ, որ ստացւում է, քանզի կան արթուն հոգիներ:
Պատգամաւոր Ռոբերտ Բեգլարեանը կարեւորութեամբ անդրադարձաւ Սիրիայի Քեսաբում Թուրքիայի կողմից իրականացւող քաղաքականութեանը՝ նշելով, որ դա 20-րդ դարում գաղութատիրական քաղաքականութեան հիմնարար մասը կազմող ինքնութիւնից զուրկ «ազգաշինութեան» արդիւնքն է: Նա աւելացրեց. «Այսօր մենք այլեւս չենք բաւարարւում Ցեղասպանութեան ճանաչման պահանջով, այլ՝ ձգտում ենք արդարութեան եւ վնասի հատուցման»:
Երեկոյի գեղարւեստական բաժնում ցուցադրւեց իրանցի երաժիշտ Քուրոշ Թաւաքոլիի հեղինակած ցեղասպանութիւնների երաժշտական նախագծի Armenian Genocide տեսահոլովակը: Երգչախմբային կատարումներով ելոյթ ունեցաւ մայեստրօ Ռազմիկ Օհանեանի ղեկավարած «Մաշտոց» երգչախումբը, դաշնամուրի մօտ՝ Արին Աւանէսեան:
Նշենք, որ միջոցառմանը ներկայ էին՝ Իրանում ՀՀ արտակարգ եւ լիազօր դեսպան պրն. Գրիգոր Առաքելեանը եւ դեսպանութեան դիւանագիտական կազմը, Իսլ. խորհրդարանում Թեհրանի եւ հիւսիսային իրանահայութեան պատգամաւոր դոկտ. Կարէն Խանլարեանը, ասորիների եւ զրադաշտականների պատգամաւորները ինչպէս՝ պարսիկ այլ պատգամաւորներ, Համակարգի նպատակայարմարութիւնը բնորոշող ժողովի Ռազմավարական հետազօտութիւնների կենտրոնից՝ Ֆարհադ Քոլէյնին, պետական պատասխանատուներ, մտաւորականներ, ՀՅԴ Բիւրոյի անդամ Վիգէն Բաղումեանը, Թ. Հ. Թ. Պատգամաւորական ժողովի, եւ Թեմական ու Կրթական խորհուրդների, «Ալիք» հաստատութեան եւ օրաթերթի, նաեւ միութիւնների ներկայացուցիչներ:
Alikonline.ir
Leave a Reply