Ներկայիս Թուրքիայի Մարդին նահանգի Դերիք շրջանում միայն մեկ հայ ընտանիք է մնացել, որն այս տարի ևս նշել է Սուրբ Զատիկը: Այս մասին տեղեկացնում է թուրքական «Ռադիքալ» պարբերականը։
58-ամյա Յուրշալըն և 66-ամյա Նաիֆ Դեմիրջիներն այս շրջանի միակ հայերն են, ամեն շաբաթ և կիրակի աղոթում են տեղի Սուրբ Գևորգ հայկական եկեղեցում, այս տարի աշխարհի մյուս հայերի պես նշել են Սուրբ Զատիկը:
Ավելի վաղ տրված հարցազրույցներից մեկում հայ ամուսինները նշել են, թե գոհ են շրջանի ղեկավարության և բնակչության վերաբերմունքից, սակայն նրանց գլխավոր մտածմունքը հայկական եկեղեցու խնամքն է:
Ամուսինները ներկայացնում են իրենց պատմությունը, ներկան.
«Մինչ 1915 թվականը` այս վայրերում շուրջ 2000 հայ էր ապրում: Սակայն նրանց թիվը կրճատվեց ոչ միայն Հայոց ցեղասպանության տարիներին, այլ նաև դրանից հետո, երբ քիչ թվով հայ ընտանիքներն արտագաղթեցին: Այսօր Դերիքում ապրում են միայն Դեմիրջիները, ովքեր էլ Սուրբ Գևորգի միակ խնամողներն են:
Նրանք ամեն հանգստյան օրերին այցելում են եկեղեցի, աղոթում: Սուրբ Գևորգը հիմնադրվել է 17-րդ դարում:
Ցեղասպանությունից հետո եկեղեցին վերածվել է ախոռի, սակայն տեղի համայնքը գումար է հավաքել ու հետ գնել կրոնական կառույցը: Այն նորից սկսել է որպես եկեղեցի գործել:
Ստամբուլից տարին մեկ անգամ 1-2 ավտոբուսով գալիս են եկեղեցի, պատարագ մատուցում»,-պատմում են Դեմիրջիները:
Ամուսինները նշում են, որ չեն պատրաստվում լքել իրենց հայրենի տունը, քանի որ չեն պատկերացնում, թե ով կարող է Սուրբ Գևորգը եկեղեցուն տեր կանգնել:
Աղբյուր՝ Թուրքագիտական պորտալ
Leave a Reply