Հայաստանի երիտասարդական հիմնադրամի՝ որպես ՀՀ նախագահի գործընկեր կազմակերպության հայտարարած դրամաշնորհային մրցույթի` Հայոց ցեղասպանության ճանաչմանն ուղղված ծրագրերին վերաբերող անվանակարգում հաղթող ճանաչված երկու կազմակերպություններն այսօր իրենց ծրագրերը ներկայացրին լրագրողներին:
«Օրենքի ուժով» իրավապաշտպան ՀԿ-ի նախագահ ԳԱԱ պատմության ինստիտուտի Հայկական հարցի և Հայոց ցեղասպանության պատմության բաժնի վարիչ Արմեն Մարուքյանը նշեց, թե ցեղասպանության ճանաչման հարցում ոչ մի պետության հետ էլ հույսեր կապել պետք չէ ու նկատեց. «Ոչ մեկի հետ էլ պետք չէ հույս կապել: Հերթով այս կամ այն պետությունը Ցեղասպանության հարցը դնում է իր օրակարգում, վախեցնում Թուրքիային, հետո սկսում Թուրքիայի հետ առևտրի մեջ մտնել` հարցն օրակարգից հանելու համար»:
Պարոն Մարուքյանը նշեց նաև, որ վերջերս հրատարակել են «Ցեղասպանության հետևանքների հաղթահարման հիմնախնդիրներն ու պատմաիրավական հիմնավորումները» վերնագրով գիտական աշխատությունը, որում գիտական մակարդակով շատ ու շատ հարցերի պատասխաններ են տրվում: Նա մասնավորապես ասաց. «Այն ճանապարհը, որն այսօր ընտրել ենք, փակուղի է տանում, քանի որ միայն ճանաչումը մեզ ոչինչ չի տալու: Անհրաժեշտ է Ցեղասպանության հետևանքների հաղթահարման մասին բարձրաձայնել ու հարցին նայել այդ տեսանկյունից»:
Հայաստանի և արևմտահայության հարցերի ուսումնասիրության կենտրոնի ղեկավար Հայկազուն Ալվրցյանը, ով համագործակցում է «Մշակույթ և հասարակություն» ՀԿ-ի հետ, որն արժանացել է ՀՀ նախագահի աշխատակազմի կողմից տրամադրվող դրամաշնորհի, նշեց, թե կարևոր հարց է այսօրվա Արևմտյան Հայաստանի և Թուրքիայի այլ բնակավայրերում ապրող հայերի վիճակը, որոնց մասին շատ քիչ բան գիտենք: Նա նշեց. «Նրանք հիմնականում զանգվածաբար պարտադրված կրոնափոխ են եղել, իսկ ազգության տեսակետից էլ հանդես են գալիս որպես քրդեր, թուրքեր, արաբներ, ինչ-որ տեղ նաև ասորիներ»:
Պարոն Ալվրցյանը նաև մտահոգություն հայտնեց, թե առաջ քաշելով 1915 թվականի ցեղասպանության խնդիրը` մյուս կողմից մոռանում ենք այդ նույն ցեղասպանության շարունակությունը, որն իրականացվում է այսօր:
Leave a Reply