Թուրքիայում ալևիները բողոքի ակցիայի ժամանակ անդրադարձել են Քեսաբի դեպքերին

Թուրքիայում բողոքի ակցիա է անցկացվել Սիրիայում ընթացող պատերազմի դեմ։ Ակցիայի ժամանակ անդրադարձ է եղել նաև Քեսաբի դեպքերին։ Ակցիան կազմակերպել են Թուրքիայում գործող ալևիական կազմակերպությունները` «Փիր Սուլթան Աբդալան Ջանլար» կազմակերպության գլխավորությամբ։

Ակցիայի մասնակիցներն ապրիլի 19-ի երեկոյան հավաքվել են Ստամբուլի Քադըքյոյ շրջանում, որտեղ պարզել են պաստառներ, կոչեր հնչեցրել, ինչպես նաև հայտարարություն կարդացել։ Ցուցարարները բողոքել են Սիրիայում ընթացող պատերազմից և դրանում Թուրքիայի ունեցած դերակատարումից՝ մեղադրելով իշխող Արդարություն և զարգացում կուսակցությանն ու նրա ղեկավար Թայիփ Էրդողանին պատերազմին իսլամիստներին աջակցելու համար։

«ԱԶԿ, ձեռքերդ հեռու Սիրիայից», «Սիրիայի ժողովուրդը միայնակ չէ». նմանատիպ պաստառներ են պարզել ակցիայի մասնակիցները, որոնք նաև հայտարարությամբ են հանդես եկել։ Հայտարարությունում անդրադարձ է եղել նաև Քեսաբի դեպքերին. ակցիայի կազմակերպիչները խիստ քննադատել են քեսաբահայերի տեղահանումը, նրանց գույքի բռնագրավումն ու թալանը։

Աղբյուր՝ Թուրքագիտական պորտալ

AllTurkey.am